First Nepali Narrative Film at Cannes Signs International Distribution Deal
कान्स फिल्म महोत्सवको प्रतिष्ठित ‘अन सर्टेन रिगार्ड’ विधाअन्तर्गत विश्व प्रिमियर हुन लागेको नेपाली फिल्म ‘तिनीहरू’ (Elephants in the Fog) ले अन्तर्राष्ट्रिय प्रदर्शनका लागि पहिलो वितरण सम्झौता गरेको छ। साथै, निर्माण टिमले फिल्मको आधिकारिक ट्रेलर पनि सार्वजनिक गरेको छ।
फिल्मको अन्तर्राष्ट्रिय बिक्री अधिकार ‘बेस्ट फ्रेन्ड फरेभर’ले लिएको हो। फ्रान्समा फिल्म ‘अरिजोना डिस्ट्रीब्युसन’ र ‘ले भाल्सेउर डिस्ट्रीब्युसन’ले संयुक्त रूपमा प्रदर्शन गर्नेछन्। यस्तै, जर्मनी र अस्ट्रियाको अधिकार ‘मिसिङ फिल्म्स’ले खरिद गरेको छ भने ब्राजिलमा ‘इमोभिजन’ले फिल्म प्रदर्शन गर्नेछ। नेपालमा भने ‘द टी फोक्स फिल्म्स’ले वितरण सम्हाल्ने भएको छ।
Nepali Film ‘Elephants in the Fog’ Secures International Distribution
अविनाश विक्रम शाह निर्देशित ‘तिनीहरू’ आगामी मे २० मा कान्समा प्रिमियर हुनेछ भने मे २१ मा यसको रेड कार्पेट कार्यक्रम आयोजना गरिनेछ। यो कान्स फिल्म महोत्सवमा छनोट हुने पहिलो नेपाली कथानक फिल्म बनेको छ।
यसअघि शाहको छोटो फिल्म ‘लोरी’ले सन् २०२२ को कान्स फिल्म महोत्सवमा विशेष सम्मान प्राप्त गरेको थियो। उनले मीनबहादुर भाम निर्देशित ‘शाम्बाला’को पटकथा लेखनमा पनि सहकार्य गरेका थिए। ‘शाम्बाला’ सन् २०२४ को बर्लिन फिल्म महोत्सवको मुख्य प्रतिस्पर्धामा प्रदर्शन भएको थियो।
‘तिनीहरू’को कथा नेपालको जंगलबीच रहेको एउटा सानो गाउँमा आधारित छ, जहाँ जंगली हात्तीको त्रास फैलिएको हुन्छ। कथाको केन्द्रमा किन्नर समुदायकी अगुवा पिरती छिन्, जसले आफूले प्रेम गर्ने पुरुषसँग सामान्य जीवन बिताउने सपना देखिरहेकी हुन्छिन्।
तर, समुदायकी एक युवती हराएपछि पिरती त्यसको खोजीमा निस्किन बाध्य हुन्छिन्। त्यसक्रममा उनले आफ्नो प्रेम र समुदायप्रतिको जिम्मेवारीमध्ये एउटा रोज्नुपर्ने कठिन अवस्थामा पुग्छिन्।
फिल्म ‘अन्डरग्राउन्ड टकिज नेपाल’, ‘ले भाल्सेउर’ र ‘डी गेसेलशाफ्ट डीजीएस’को निर्माणमा बनेको हो। यसमा ‘एनक्वाड्रामेन्टो प्रोडुसोएस’, ‘बबल्स प्रोजेक्ट’, ‘जिस्लरम्यान फिल्मप्रोडक्सन’, ‘स्टर्म फिल्म्स’, ‘जयन्ती क्रिएसन्स’, ‘जेडडीएफ/डास क्लाइने फर्नजेहस्पिल’ र ‘जेडडीएफ/आर्टे’ सह-निर्माताका रूपमा रहेका छन्।
यो पनि पढ्नुहोस्: सुकुम्वासी जीवन कथा बोकेको ‘आँखा: क्रलिङ क्रोज’ले जित्यो ह्युस्टन फिल्म फेस्टिभलमा डबल अवार्ड
