चर्चित लोक तथा दोहोरी गायक पशुपति शर्मा अब ठूलो पर्दामा देखिने भएका छन्। नेपाली लोकसंगीतमा लोकप्रियता हासिल गरेका शर्मा रघुजी फिल्म्सको ब्यानरमा निर्माण हुन लागेको नयाँ नेपाली चलचित्र ‘तीन तिघ्रे, क्या बिग्रे’ मार्फत अभिनयमा डेब्यु गर्न लागेका हुन्।
निर्माता रघुनाथ सापकोटाका अनुसार पशुपति शर्मासँग फिल्मका लागि औपचारिक सम्झौता भइसकेको छ। चलचित्रमा उनको मुख्य भूमिका रहने बताइएको छ।
फिल्मका लेखक तथा निर्देशक अमरदीप सापकोटा हुन्। निर्माण टिमका अनुसार चलचित्र आगामी असारको दोस्रो सातादेखि छायांकनमा जाने तयारीमा छ। फिल्मको शीर्षकले हास्य तथा सामाजिक कथावस्तुको संकेत गरे पनि यसको विस्तृत कथा भने निर्माण पक्षले सार्वजनिक गरेको छैन।
पछिल्लो समय नेपाली संगीत क्षेत्रमा लगातार चर्चामा रहेका पशुपति शर्मा अब अभिनयमार्फत दर्शकमाझ नयाँ रूपमा प्रस्तुत हुने तयारीमा छन्। लोकदोहोरी गायनमा जस्तै अभिनय क्षेत्रमा पनि उनले आफ्नो प्रभाव छोड्ने अपेक्षा गरिएको छ।
नेपाली चलचित्र क्षेत्रमा नयाँ अनुहार र फरक व्यक्तित्वको खोजी भइरहेका बेला पशुपति शर्माको आगमनले दर्शकमाझ उत्सुकता बढाएको छ। गायनबाट करोडौं दर्शकको मन जितेका शर्मा अब ठूलो पर्दामा कस्तो भूमिकामा देखिनेछन् भन्ने चासो बढ्न थालेको छ।
