आगामी हरितालिका तीजलाई लक्षित गर्दै नेपाली चलचित्र ‘बेहुली’ भदौ २६ गतेदेखि देशभरका सिनेमाघरमा प्रदर्शन हुने भएको छ। काठमाडौंमा आयोजित विशेष समारोहबीच चलचित्रको औपचारिक पोस्टर सार्वजनिक गर्दै निर्माण टिमले प्रदर्शन मिति घोषणा गरेको हो।
‘द डिभाइन म्युजिक’ र ‘सम्मान इन्टरटेन्मेन्ट’को ब्यानरमा निर्माण भएको यो चलचित्र सार्वजनिक पोस्टरकै कारण चर्चामा आएको छ। पोस्टरले गहिरो, भावनात्मक र विद्रोही प्रेमकथाको संकेत दिन्छ।
सार्वजनिक तस्बिरमा अभिनेता पारस बम ठकुरी ‘कुलब्वाय’ गम्भीर भावमा देखिएका छन्। उनको अनुहारमा सामान्य चोट छ भने नाडीमा हतकडी झुन्डिएको देखिन्छ। अर्कोतर्फ, रातो विवाह पहिरन र गहनामा सजिएकी दिव्या रायमाझी आँखा चिम्लिएर पारसको छातीमा टाउको अडेसाएकी छन्।
हतकडी लागेको पुरुषलाई बेहुलीले दिएको भावनात्मक आलिङ्गनले चलचित्रभित्र प्रेमसँगै पारिवारिक वा सामाजिक द्वन्द्वको गहिरो तह रहेको संकेत गर्छ। पोस्टरमा प्रेम, पीडा र विद्रोहको मिश्रण देखिन्छ, जसले ‘बेहुली’लाई सामान्य प्रेमकथाभन्दा फरक सिनेमाका रूपमा प्रस्तुत गरेको छ।
यो आकर्षक तस्बिर श्रीधर पौडेलले खिचेका हुन् भने ट्राइडेन्ट कन्सेप्टका रोयल भीमसेनले यसलाई पोस्टरको रूप दिएका हुन्।
पोस्टर सार्वजनिक कार्यक्रममा मुख्य कलाकार पारस र दिव्या पोस्टरकै भाव र पहिरनमा मिडियासामु प्रस्तुत भएका थिए। दिव्या बेहुलीको पहिरनमा देखिइन् भने पारसको हातमा हतकडी थियो। मञ्चमै उनीहरूले प्रेमिल भाव प्रस्तुत गर्दा उपस्थित सञ्चारकर्मी र अतिथिको ध्यान खिचिएको थियो।
चलचित्रमा पारस र दिव्यासँगै सुशान्त कार्कीको पनि प्रमुख भूमिका रहनेछ। ‘होस्टेल ३’बाट ठूलो पर्दामा डेब्यु गरेका पारस यसपटक बढी परिपक्व र संवेदनशील प्रेमकथामा देखिन लागेका छन्। युवापुस्तामाझ लोकप्रिय कुलब्वाय र दिव्याको फ्रेस अनस्क्रिन जोडीलाई दर्शकले कसरी स्वीकार गर्छन् भन्ने चासो अहिलेबाटै बढेको छ।
निर्माण पक्षले तीजको उल्लासमय माहौल र ‘बेहुली’को मर्मस्पर्शी कथाको संयोजनले दर्शकलाई फरक सिनेम्याटिक अनुभव दिने विश्वास व्यक्त गरेको छ।
‘होस्टेल ३’मा सहकार्य गरेका सशान कँडेल र माधव शर्माको जोडीले नै ‘बेहुली’लाई आकार दिएको हो। माधव शर्माको कथामा सशान कँडेलले निर्देशन सम्हालेका छन्। सुदीप कुँवर मुख्य सहायक निर्देशक रहेको चलचित्रमा योगेन्द्र कार्की र मार्लोभ ढुङ्गानाले सहायक निर्देशकका रूपमा काम गरेका छन्।
चलचित्रमा पारस, दिव्या र सुशान्तसँगै पदम तामाङ, सन्तोष बानियाँ, सरिता गिरी, विशाल पहारी, कर्मा लामा, दीपक गौली, विमल यादव, अविरल श्रेष्ठ, सविन कट्टेल र समायरा थापा मगरको अभिनय रहेको छ।
प्राविधिक पक्षमा नरेन्द्र मैनालीको छायांकन, विकास दाहालको सम्पादन र रोशन श्रेष्ठको एक्सन कोरियोग्राफी रहनेछ।
चर्चित संगीतकार अर्जुन पोखरेलले निर्माण गरेको चलचित्रमा प्रताप शमशेर राणा निर्माता छन्। कार्यकारी निर्मातामा शङ्कर कोइराला र रमेश सिलवाल, सह-निर्मातामा दुर्गा खरेल र शिशिर श्रेष्ठ छन्। त्यस्तै, कोसिस राज क्षेत्री र सम्राट क्षेत्री लाइन प्रोड्युसर हुन्।
चलचित्रको प्रोडक्सन हेड यमप्रसाद ओली हुन्। प्रोडक्सन डिजाइन किशोर नेपाल, मेकअप राजु वाइबा र पहिरन डिजाइन एलेक्स बासुकलाले गरेका छन्।
काठमाडौं उपत्यकाभित्र चलचित्रलाई काफिया फिल्म्सले वितरण गर्नेछ भने उपत्यकाबाहिर श्री व्यंकटेश इन्टरटेन्मेन्टले वितरणको जिम्मा लिएको छ। चलचित्रको डिजिटल अधिकार ओएसआर डिजिटलले खरिद गरेको छ।
तीजको अवसर, भावनात्मक प्रेमकथा, पारस र दिव्याको नयाँ जोडी तथा पोस्टरले दिएको विद्रोही संकेतका कारण ‘बेहुली’ यस वर्ष प्रतीक्षित नेपाली चलचित्रमध्ये एक बन्ने देखिएको छ।
