मेरिल्यान्डकी दीपिका शर्माले ‘मिस नेपाल नर्थ अमेरिका २०२६’ को ताज जितेकी छन्। नेपाली युवतीहरूको आत्मविश्वास, नेतृत्व र सांस्कृतिक पहिचानलाई केन्द्रमा राखिएको प्रतियोगितामा अनामिका श्रेष्ठ, अनामिका खड्गी र रेश्मा निरौला उपविजेता बने।
भर्जिनियाको क्लिफ्टनस्थित सेन्टरभिल हाई स्कुल, जुलाई २५ मा सम्पन्न ग्रान्ड फिनालेमा प्रतियोगी नम्बर ५ दीपिका विजेता घोषित भएकी हुन्।
मिसिगनकी अनामिका श्रेष्ठ प्रथम उपविजेता, साउथ क्यारोलाइनाकी अनामिका खड्गी द्वितीय उपविजेता र टेक्ससकी रेश्मा निरौला तृतीय उपविजेता बनेका छन्।
दीपिकालाई प्रतियोगिताका आधिकारिक प्रचार सामग्रीमा मेरिल्यान्डको प्रतिनिधि तथा प्रतियोगी नम्बर ५ का रूपमा प्रस्तुत गरिएको थियो। उनले आफ्नो परिचयका क्रममा आफ्नो गृहसहर पोखरा भएको बताएकी थिइन्।
चार विजेतालाई प्रमुख उपाधि
यस वर्षको प्रतियोगितामा विजेतासहित तीन उपविजेतालाई प्रमुख उपाधि प्रदान गरिएको छ।
अन्तिम नतिजाअनुसार:
मिस नेपाल नर्थ अमेरिका २०२६: दीपिका शर्मा, मेरिल्यान्ड
प्रथम उपविजेता: अनामिका श्रेष्ठ, मिसिगन
द्वितीय उपविजेता: अनामिका खड्गी, साउथ क्यारोलाइना
तृतीय उपविजेता: रेश्मा निरौला, टेक्सस
आयोजक ड्रिम्स युनिभर्सलले प्रतियोगितालाई ताज जित्ने प्रतिस्पर्धामा मात्र सीमित नराखी साहस, आत्मविश्वास, संस्कृति र नेपाली समुदायको भावनासँग जोडिएको उत्सवका रूपमा व्याख्या गरेको छ।
प्रतियोगितापछि जारी सन्देशमा आयोजकले सबै सहभागीलाई बधाई दिँदै केहीले मात्र ताज पाए पनि प्रत्येक प्रतियोगी अझ आत्मविश्वासी र सबल महिलाका रूपमा फर्किएको उल्लेख गरेको छ।
नेपाली पहिचान र नेतृत्वको मञ्च
मिस नेपाल नर्थ अमेरिकाले उत्तर अमेरिकामा रहेका नेपाली मूलका युवतीलाई आफ्नो प्रतिभा, विचार, नेतृत्व क्षमता र सांस्कृतिक पहिचान प्रस्तुत गर्ने अवसर प्रदान गर्दै आएको छ।
प्रतियोगिताअघि सहभागीहरू वासिङ्टनस्थित नेपाली दूतावास पुगेका थिए। दूतावासले उनीहरूलाई अमेरिकाभर नेपाल, नेपाली संस्कृति र समुदायको सकारात्मक प्रतिनिधित्व गर्न प्रोत्साहित गरेको थियो। नेपाली दूतावासका कार्यवाहक राजदूत शरदराज आरण कार्यक्रममा प्रमुख अतिथिका रूपमा उपस्थित थिए।
प्रतियोगीहरूको प्रशिक्षण तथा मार्गदर्शनमा मिस नेपाल वर्ल्ड २०२२ प्रियंका रानी जोशी, भावना कल्वानी र सुवेक्षा खड्कालगायत व्यक्तित्व सहभागी रहेको आयोजकले जनाएको छ।
निर्णायक मण्डलमा प्रियंका रानी जोशी, अधिवक्ता बन्दिता शर्मा दाहाल, चलचित्र निर्देशक दिनेश लिङ्देन, अधिवक्ता बासु फुलारा, मन्दिरा मैनाली, राजेन्द्र श्रेष्ठ र अभिनेत्री तथा मोडल नीति शाह रहेका थिए।
अन्तिम प्रतिस्पर्धामा १६ सहभागी
आयोजकबाट प्राप्त कार्यक्रमपछिको विवरणअनुसार अन्तिम प्रतिस्पर्धामा १६ युवती सहभागी थिए।
प्रतियोगीहरूमा आइसा थापा, अनामिका खड्गी, अनामिका श्रेष्ठ, बिबिका कोइराला, दीपिका शर्मा, ज्योत्स्ना बेलबासे क्षेत्री, मोबिसा लामा, प्राप्ति श्रेष्ठ, प्रियाशा देवकोटा, रेश्मा निरौला, रिया मल्ल, रोज्जा खरेल, शब्या बिष्ट, टेरिसा बराल, उपासना अधिकारी र जिया थापामगर रहेका थिए।
यसअघि सार्वजनिक प्रचार सामग्रीमा भने २० फाइनलिस्टको नाम घोषणा गरिएको थियो। अन्तिम प्रतिस्पर्धासम्म आइपुग्दा संख्या घट्नुको कारणबारे आधिकारिक स्पष्टीकरण सार्वजनिक गरिएको छैन।
डीसी क्षेत्रमा नेपाली समुदायको उत्साह
सन् २०२६ को संस्करण वासिङ्टन डीसी महानगर क्षेत्रमा आयोजना गरिनुले स्थानीय नेपाली समुदायमा कार्यक्रमप्रति थप चासो सिर्जना गरेको थियो।
ड्रिम्स युनिभर्सल मुख्य आयोजक रहेको प्रतियोगिताको नेतृत्व संस्थापक शैलेश श्रेष्ठले गरेका थिए। स्थानीय व्यवस्थापनमा बिना लामा खड्का, चन्द्र लामा तथा यूएस इन्टरटेनमेन्टको टोली संलग्न रहेको आयोजकले जनाएको छ।
श्रव्यदृश्य र तस्बिर व्यवस्थापनमा नाम्लो इभेन्ट्सको टोलीले काम गरेको थियो। आयोजकले स्वयंसेवक, निर्णायक, प्रशिक्षक, कोरियोग्राफर, प्रायोजक, साझेदार, सञ्चारमाध्यम र दर्शकलाई कार्यक्रम सफल बनाउन पुर्याएको योगदानका लागि धन्यवाद दिएको छ।
आयोजकबाट प्राप्त विवरणमा विजेताले मिस नेपाल २०२७ सँग सम्बन्धित प्रत्यक्ष अवसर पाउने उल्लेख छ।
दीपिका र अन्य तीन उपविजेताका लागि ताज जित्नु यात्राको अन्त्य होइन। अब उनीहरूका सामाजिक पहल, सार्वजनिक प्रतिनिधित्व र नेपाली समुदायसँगको संलग्नताले उपाधिको वास्तविक प्रभाव निर्धारण गर्नेछ।
