बाग्मतीमा राजेश र शिवको फाइट(फोटोफिचर)

काठमाडौं । पुराना एक्सन नायक शिव श्रेष्ठ र महानायक राजेश हमालको द्वन्द्व सायदै त कुनै पनि फिल्ममा छैन । तर दुई करोड बजेटको लगानीमा बनेको फिल्म ‘बाग्मती’मा भने यी दुई स्टारको द्वन्द्वलाई दर्शकले हेर्न पाउने भएका छन् । निकै गोप्य रुपमा छायांकन गरिएको यो फिल्मको सार्वजनिक तस्वीरमा यी दुई कलाकारको द्वन्द्वलाई पनि देखाइएको छ ।
सन्नी (केरला) को लेखन तथा निर्देशन रहेको फिल्म भारतभर प्रदर्शनका लागि सम्झौता गरिएको छ । भारतको केरलास्थित हरिश कुमार एमके र फिल्म निर्माण कम्पनी ट्री इन्टरटेन्टमेन्ट प्रालिबीच फिल्म भारतभर प्रचारप्रसार एवं प्रदर्शन गर्नका लागि लिखित सम्झौतासमेत भएको छ । सम्झौतामा फिल्मका तर्फबाट कार्यकारी निर्माता अनिश नपित र वितरकको तर्फबाट हरिश कुमारले हस्ताक्षर गरेका छन् ।
फिल्मलाई भारतभर रिलिजका मलायलम, तमिल, कन्नड, तेलुगु, ओलिया, बंगाली, भोजपुरी, हिन्दी, गुजराति, पञ्जाबी, मराठि, काश्मीर लगायत भाषामा फिल्म डबिङ हुनेछ । फिल्मलाई ट्री इन्टरटेन्मेन्टको ब्यानरमा निर्माण गरिएको हो । फिल्मका निर्माता दिनेश दर्शनधारी र विजय सत्याल हुन् ।
फिल्मको पोष्ट प्रोडक्शनको लागि मात्रै पचास लाख भन्दा बढी खर्च हुने निर्माता अनिश नापितले जानकारी दिनुभयो । फिल्ममा राजेश हमाल, शिव श्रेष्ठ, कञ्चन ठकुरी, केकी अधिकारी, ध्रुब कोइराला लगायतका कलाकारहरुको अभिनय रहेको छ ।