एक्सन र प्रेम कथाको मिश्रण बोकेको नयाँ नेपाली फिल्म ‘कुम्भ’ आगामी जेठ १५ गतेदेखि देशभर प्रदर्शनमा आउने भएको छ। निर्देशक रन्धिर श्रेष्ठको लेखन तथा निर्देशनमा बनेको यो फिल्मले नेपाली फिल्म बजारमा नयाँ शैलीको एक्सन–लभ स्टोरी प्रस्तुत गर्ने दाबी गरिएको छ।
लामो समयदेखि म्युजिक भिडियो र छायांकन क्षेत्रमा सक्रिय श्रेष्ठले यसपटक ठूलो स्केलमा फिल्म निर्माण गरेका हुन्। ‘कुम्भ’ ए रस प्रोडक्सनको ब्यानरमा बनेको हो, जसलाई नेपालीसँगै हिन्दी भाषामा पनि रिलिज गरिने तयारी गरिएको छ। यसले फिल्मलाई अन्तर्राष्ट्रिय बजारमा समेत पुग्ने सम्भावना बढाएको छ।
फिल्ममा दक्षिण भारतीय कलाकार सुरेन्द्र ठाकुरको सहभागिता छ, जसले कथामा नयाँ स्वाद थप्ने अपेक्षा गरिएको छ। मुख्य भूमिकामा नवनायक अशोक आर्यन देखिनेछन् भने अनुभवी कलाकार सुनिल थापा र सुशील पोखरेलले पनि महत्वपूर्ण भूमिका निभाएका छन्। साथै रोहित रुम्बा, अफ्सना थापा र सृष्टि खड्का पनि प्रमुख भूमिकामा छन्।
‘कुम्भ’को छायांकन नेपालका विभिन्न लोकेसनसँगै साउथ इन्डियामा समेत गरिएको छ। ठूलो स्केलको एक्सन दृश्य र फरक भिजुअल स्टाइल फिल्मको विशेषता हुने निर्माण टिमको दाबी छ।
फिल्मको सिनेमाटोग्राफी स्वयं निर्देशक श्रेष्ठले गरेका छन् भने एक्सन दृश्यलाई मजबुत बनाउन द्वन्द्व निर्देशन संजय थापाले सम्हालेका छन्। निर्माणमा रन्धिर श्रेष्ठ र राजेश साह संलग्न छन्।
प्रचारको सुरुवात पनि चाँडै हुने भएको छ। निर्देशक श्रेष्ठका अनुसार फिल्मको पहिलो गीत यही शुक्रबार सार्वजनिक गरिनेछ, जसले ‘कुम्भ’को अफिसियल प्रमोशन अभियान सुरु गर्नेछ।
हाल नेपाली फिल्म बजारमा एक्सन जनरका फिल्मको संख्या बढ्दै गइरहेको अवस्थामा ‘कुम्भ’ले दर्शकलाई कत्तिको आकर्षित गर्छ, त्यो भने रिलिजपछि स्पष्ट हुनेछ।
यो पनि पढ्नुहोस्:
चार मिस नेपाल सहितको रेखा थापाको फिल्म ‘माया भनेकै यस्तो होला’ सुटिङ सकियो तीजमा रिलिज हुने तयारी
