पर्यटन व्यवसायमा क्रिकेटर करण केसी, मुस्ताङको लेतेमा आकर्षक रिसोर्ट

नेपाली क्रिकेटका चर्चित खेलाडी करण केसी अब मैदानबाहिर पर्यटन व्यवसायमा पनि नयाँ इनिङ्स सुरु गरेका छन्। पत्नी वर्षा बस्नेत केसीसँग मिलेर उनी मुस्ताङको लेतेमा निर्माण भइरहेको ‘The Lete Gaun Resort’ मार्फत हिमालप्रतिको आफ्नो प्रेमलाई पर्यटन र उद्यमसँग जोड्दैछन्।

बेनी–जोमसोम सडकखण्डमा पर्ने रमणीय लेते गाउँमा निर्माण भइरहेको रिसोर्टका केही झलक करणले सामाजिक सञ्जालमार्फत सार्वजनिक गरेका छन्। उनले “केही विशेष” तयार भइरहेको संकेत गर्दै पाहुनालाई स्वागत गर्न र सम्झनायोग्य अनुभव दिन आफूहरू उत्साहित रहेको बताएका छन्।

करणका लागि यो परियोजना केवल एउटा नयाँ व्यावसायिक लगानी भने होइन। यससँग हिमालप्रतिको उनको पुरानो लगाव र व्यक्तिगत सपना पनि जोडिएको छ।

ट्रेकिङका क्रममा हिमालको काखमा आफ्नै एउटा घर बनाउने कल्पना गर्ने गरेको उनले उल्लेख गरेका छन्। अहिले त्यही कल्पना विस्तारै वास्तविकतामा बदलिँदै गएको छ। करणले यसलाई नेपाली युवाको सपनासँगै नेपालको पर्यटन क्षेत्रमा आफ्नो सानो योगदानका रूपमा पनि प्रस्तुत गरेका छन्।

प्राकृतिक सौन्दर्यबीच नयाँ रिसोर्ट

सार्वजनिक तस्बिरहरूमा रिसोर्ट सल्लाको जंगल र पहाडी प्राकृतिक परिवेशबीच निर्माण भइरहेको देखिन्छ। मुख्य भवनसँगै छुट्टाछुट्टै कटेजसमेत रहेको देख्न सकिन्छ, जसले रिसोर्टलाई प्रकृतिनजिकको बसाइ अनुभव दिनेछ।

मुस्ताङ नेपालका चर्चित पर्यटन गन्तव्यमध्ये एक हो। अन्नपूर्ण क्षेत्र, मुक्तिनाथ तथा अपर मुस्ताङतर्फ जाने स्वदेशी र विदेशी यात्रुका कारण यो क्षेत्र वर्षौंदेखि पर्यटकको रोजाइमा पर्दै आएको छ।

लेते बेनी–जोमसोम मार्गमै पर्ने भएकाले ‘The Lete Gaun Resort’ को स्थान पनि पर्यटन व्यवसायका दृष्टिले महत्वपूर्ण देखिन्छ।

क्रिकेटको चर्चाबाट उद्यमतर्फ

क्रिकेटले आफूलाई पहिचान दिएको बताउँदै आएका करणका लागि हिमालसँगको सम्बन्ध भने व्यक्तिगत भावना र रुचिसँग जोडिएको छ। अब त्यही सम्बन्ध उनको उद्यमशील यात्राको हिस्सा बन्दै गएको छ।

रिसोर्टसम्बन्धी सामाजिक सञ्जाल पोस्टहरूमा स्थानीय पर्यटन प्रवर्द्धन, रोजगारी सिर्जना र स्थानीय अर्थतन्त्रमा योगदान पुर्‍याउने विषय पनि उल्लेख भएका छन्। करणले पर्यटन क्षेत्रमा योगदान गर्ने सोच व्यक्त गरे पनि रिसोर्टबाट कति रोजगारी सिर्जना हुनेछ भन्ने ठोस विवरण भने सार्वजनिक भएको छैन।

करणसँगै उनकी पत्नी वर्षा बस्नेत केसी पनि रिसोर्ट परियोजनासँग सम्बन्धित तस्विरहरुमा देखिएकी छन्।
थप तस्विरहरु हेर्न यहाँ क्लिक गर्नुहोस्।

सामाजिक सञ्जालमा बढ्दो चासो

क्रिकेट मैदानबाहिर करणले सुरु गर्न लागेको यो नयाँ यात्राले सामाजिक सञ्जालमा पनि उल्लेख्य चासो पाएको छ। रिसोर्टसम्बन्धी उनको एउटा फेसबुक पोस्टहरुमा हजारौ प्रतिक्रिया देखिएका छन्। रिसोर्टको औपचारिक सञ्चालन मितिबारे आधिकारिक उद्घाटन मिति सार्वजनिक भएको छैन।

क्रिकेट मैदानमा आफ्नो छुट्टै पहिचान बनाएका करण केसीका लागि ‘The Lete Gaun Resort’ अब जीवनको अर्को रोचक अध्याय बन्ने क्रममा छ, जहाँ क्रिकेटबाट कमाएको लोकप्रियता, हिमालप्रतिको प्रेम, उद्यमशीलता र नेपालको पर्यटन एउटै कथामा जोडिएका छन्।