नेपाली फिल्महरु विदेशमा छायांकन हुने ट्रेन्ड विकसित भए झैं नेपाली आधुनिक तथा पप गीतका म्युजिक भिडियोहरु पनि विदेशका आकर्षक लोकेशनमा छायांकन हुन थालेका छन्।
युवा गायक सुभाष सुन्दासले गाएको एउटा गीतको म्युजिक भिडियो यूरोपको सुन्दर देश साइप्रसका आकर्षक लोकेशनमा छायांकन गरिएको छ। साइप्रसको समुद्री किनारामा छायांकन गरिएको उक्त भिडियो गायकको गायन तथा कलाकारहरुको अभिनयसहित आकर्षक लोकेशनका कारण पनि चर्चामा आएको छ।
गायक सुन्दासले आफ्नो सोलो एल्बम उड्न देउको शीर्षक गीत उड्न देउ…को म्युजिक भिडियो साइप्रसमा छायांकन गराएका हुन्। भिडियोमा गायक सुन्दास आफैंले पनि अभिनय गरेका छन्। उक्त गीतमा गायक सुन्दासकै शब्द तथा संगीत समावेश छ।
बिरन मगरको निर्देशन तथा छायांकनको उक्त भिडियोमा गायक सुन्दास संगै सोनिया श्रेष्ठ तथा दिनेश कार्कीले अभिनय गरेका छन्। भिडियोमा एउटा रोमाञ्चक प्रेम कथालाई चित्रण गरिएको छ। माधव बेल्बासेद्वारा सम्पादन गरिएको उक्त भिडियोका केही दृष्यमा भिएफएक्स समेत गरिएको छ। सुनिल थापाले भिडियोमा भिएफएक्स गरेका छन्।
गायक सुभाष सुन्दासको ‘उड्न देउ’ म्युजिक भिडियो हेर्नुहोस्
