आफ्नो नग्न तस्वीर ट्वीटरको एकाउण्टमा देख्दा जोकोही पनि आत्तिन्छ । तेलेगु फिल्मकी अभिनेत्री अञ्जली द्विवेदी पनि आफ्नो नग्न तस्वीर सामाजिक सञ्जाल ट्वीटरमा देख्दा निकै आत्तिईन् । कोही एक प्रयोगकर्ताले उनको तस्वीर फेक एकाउण्ट बनाएर हालिदिएपछि उनी अहिले प्रहरीको शरणमा पुगेकी छन् ।
तेलेगु फिल्मकी प्रख्यात यी अभिनेत्री गत महिना मध्यप्रदेशबाट मुम्बई सरेकी थिईन् । उनी हिन्दी फिल्ममा काम खोज्नका लागि मुम्बई आएकी हुन् । अञ्जलीले आफ्नो नग्न तस्वीर ट्वीटरमा हाल्ने विरुद्ध मलवानी पुलिस स्टेशनमा निवेदन दर्ता गराएकी छन् । प्रहरीका अनुसार अञ्जलीले मध्य प्रदेशको रिवा जिल्लाका आफ्नो साथीको सम्पर्कमा रहनका लागि ट्वीटर एकाउण्ट बनाएकी थिईन् । अञ्जलीको साथीले उनलाई फोन गरेर ट्वीटरमा नग्न फोटो राखेको भनेपछि उनले उक्त फोटो हेरेर प्रहरीमा निवेदन दिएकी हुन् ।
अञ्जलीले प्रहरीलाई उक्त एकाउण्ट बन्द गरेर दोषीलाई पत्ता लगाउन आग्रह गरेकी छन् । प्रहरीले नायिकाको निवेदन दर्ता गर्दै साइबर क्राइम विभागको मद्धत लिएर दोषीको खोजी गरिरहेको छ ।
