The makers of ‘World of Monalisa – Bloody Love’ shared the film’s first look. Directed by King Yogi and produced by Prashant Giri, the film is set to shoot in Nepal and India.
‘वर्ल्ड अफ मोनालिसा’ शीर्षकको मोसन पोस्टर सार्वजनिक गर्दै निर्माण टोलीले ‘मोनालिसा ब्लडी लभ’को पहिलो झलक देखाएको छ। नेपाल र भारतका चलचित्रकर्मीले मिलेर बनाउन लागेको फिल्मको तयारी अहिले हैदराबाद र बैंगलोरमा चलिरहेको छ। टोलीले आगामी असारदेखि छायाङ्कन सुरु गर्ने योजना बनाएको छ।
पीजी स्टुडियोको प्रस्तुतिमा प्रशान्त गिरीले फिल्म निर्माण गर्दै छन्। फिल्मका लेखक तथा निर्देशक किङ योगी हुन्। चलचित्र पत्रकार सचित खड्का कार्यकारी निर्माताका रूपमा जोडिएका छन्।
निर्माण टोलीका अनुसार फिल्मको करिब ३० प्रतिशत छायाङ्कन नेपालमा र बाँकी ७० प्रतिशत भारतमा गर्ने योजना छ। भारतमा खिचिने केही महत्त्वपूर्ण दृश्यका लागि टोलीले हैदराबादको रामोजी फिल्म सिटी रोजेको छ। फिल्ममा दुवै देशका कलाकारले अभिनय गर्नेछन्। मोसन पोस्टर सार्वजनिक गरे पनि टोलीले कलाकारहरूको नाम भने खुलाएको छैन।
छायाङ्कनपछिका अधिकांश प्राविधिक कामका लागि पनि भारतीय कम्पनी र प्राविधिकसँग सहकार्य गर्ने तयारी छ। यसमा सम्पादन, रङ संयोजन, ध्वनि डिजाइन, दृश्य प्रभाव र अन्तिम डिजिटल प्रति तयार पार्नेसम्मका काम पर्छन्। प्रचार सामग्रीको डिजाइनमा पनि भारतीय टोलीसँग सहकार्य गर्ने योजना छ।
निर्माण टोलीले ‘मोनालिसा ब्लडी लभ’ नेपाली र हिन्दीसहित पाँच भाषामा प्रदर्शन गर्ने लक्ष्य राखेको छ। अन्तर्राष्ट्रिय दर्शकसम्म फिल्म पुर्याउन ओटीटी प्लेटफर्महरूसँग वितरण र प्रदर्शनबारे छलफल भइरहेको टोलीले जनाएको छ। कुन प्लेटफर्मबाट फिल्म हेर्न पाइनेछ भन्ने टुङ्गो लाग्न बाँकी छ।
