ग्याङस्टार ‘षडङ्ग’को ट्रेलर र गीत सार्वजनिक

काठमाडौं । पैसा, सुन्दरता, ग्ल्यामर र यौनसँगै एक्सनले भरिपूर्ण फिल्म ‘षडङ्ग’को ट्रेलर र गीत सार्वजनिक भएको छ । राजधानीमा बुधबार आयोजित कार्यक्रममा गीत र ट्रेलर सार्वजनिक गरिएको हो ।

फिल्ममार्फत निर्देशनमा डेब्यु गरेका निर्देशक सुरज सुनुवारले फिल्मको नामले राजनीतिको प्रमुख ६ वटा अंगलाई समेट्ने बताए । ‘समाजका हरेक विषयसँग राजनीतिको निकटता रहेको हुन्छ, त्यही कुरालाई ग्याङस्टार शैलीले मैले फिल्ममा प्रस्तुत गरेको छु ।’ निर्देशक सुनुवारले भने । फिल्मको कथा उनैले लेखेका हुन् ।
कार्यक्रममा फिल्मका अभिनेता अनुप बरालले फिल्म मसलेदार भन्दा पृथक शैलीमा बनेको दाबी गरे । अभिनेत्री प्रियंका कार्कीले फिल्ममा आफ्नो भूमिका चुनौतिपूर्ण रहेको बताईन् ।
फिल्ममा अनुप र प्रियंकासहित सौगात मल्ल, विजय लामा, सौरमराज तुलाधर, ए गुरुङ र नविन मानन्धरले अभिनय गरेका छन् भने हर्षिका कार्कीले विशेष प्रस्तुति रहेको छ । लुमिनस पिक्चर्सको व्यानरमा समिर सुनुवारले निर्माण गरेको फिल्ममा निमेष श्रेष्ठको सम्पादन, सुजेन्द्र डी कार्कीको स्रगीत, अष्ट महर्जनको द्वन्द्व, गोविन्द राईको नृत्य र नरेन्द्र मैनालीको छायांकन रहेको छ । फिल्म चैत्र १३ गतेबाट अल नेपाल रिलिज हुँदैछ ।