काठमाडौं । अभिनेता, निर्माता तथा निर्देशक आकाश अधिकारीले नेतृत्व गरेको संस्था आशाको ज्योति नेपालले ललितपुरको दुर्गम शंखुस्थित मगर गाउँमा रहेको कालीदेवी प्राथमिक विद्यालयको नयाँ भवन निर्माण गरिदिएको छ।
ग्लोबल रिच इन्टरटेनमेन्टको सहकार्यमा आशाको ज्योतिले बनाइदिएको तीन कोठे भवनको सूचना तथा सञ्चारमन्त्री डा. मिनेन्द्र रिजालले शनिवार उद्घाटन गरे । गत वैशाख १२ गतेको विनाशकारी भूकम्पका कारण विद्यालयको भवनमा क्षति पुगेपछि आकाशको पहलमा नयाँ भवन निर्माण गरिएको हो । संस्थाका अध्यक्ष आकाशले भूकम्प पछि संस्थाले विभिन्न स्थानमा भूकम्प पीडितलाई राहत सामाग्री बाँडिरहेका बेला स्थानीय व्यक्तिहरुले आफुलाई सम्पर्क गरेपछि गाउँमा विद्यालय बनाइदिएको बताए । ‘हामी अब आगामी दिनमा अन्य भूकम्प प्रभावित क्षेत्रमा गएर २० वटा विद्यालय बनाइदिँदैछौं,’आकाशले भने,‘विद्यालय भवनको अभावमा विद्यार्थीहरु शिक्षाबाट बञ्चित हुनुपर्ने अवस्था देखिएपछि हामीले भवन बनाइदियौं।’
मन्त्री डा. रिजालले नेपालमा भूकम्प गएपछि सबैभन्दा बढी कलाकारहरु सक्रिय भईरहेकोमा खुशी व्यक्त गर्दै सरकारी तवरबाट पनि भूकम्प पीडितको पुनस्र्थापनाका लागि काम भईरहेको बताए । कार्यक्रममा हाँस्य कलाकार केदार घिमिरे ‘माग्ने बुढा’ र दीपाश्री निरौलाले कलाकारले भूकम्प पीडितहरुलाई गरेको सहयोगको स्मरण गर्दै कमेडी प्रस्तुत गरेर हँसाएका थिए।
ललितपुर क्षेत्र नम्बर १ का सभासद उदय राणाले आफ्नो क्षेत्रमा भएको भूकम्पबाट क्षतिलाई मूल्यांकन गर्दै राहतका लागि सरकारसँग पहल भईरहेको बताए । कार्यक्रममा मन्त्री डा. रिजाल, संस्थाका अध्यक्ष अधिकारीले विद्यालय व्यवस्थापन समितिलाई विद्यालय हस्तान्तरण गरेका थिए । संस्थाका अनुसार करिब नौ लाख रुपैंयाँको बजेटमा भवन निर्माण गरिएको थियो।
