माघ २९ गतेबाट प्रदर्शनमा आउने फिल्म ‘क्लासिक’का सम्पुर्ण गीतको अडियो यु ट्युबमा जुकबक्स मार्फत सार्वजनिक गरिएको छ। सांगीतिक प्रेम कथामा निर्माण भएको यो फिल्ममा ताराप्रकाश लिम्बुको संगीत छ। दिनेश राउतले निर्देशन गरेको फिल्मलाई सुवास गिरीले निर्माण गरेका हुन्।
फिल्मका ४ वटा गीतले उचाइ लिनेमा संगीतकार ताराप्रकाश लिम्बु ढुक्क देखिएका छन्। फिल्मको कथा अनुसार आफूहरुले गीत तयार पारेको निर्माता सुवास गिरीले बताए। दिनेश राउतको निर्देशनमा तयार भएको फिल्ममा आर्यन सिग्देल र नम्रता श्रेष्ठको भिन्न लुक्स देखिएको छ। यी दुइले फिल्ममा आँखा देख्न नसक्ने पात्रको भूमिका निर्वाहा गरेका छन्।
फिल्ममा समावेश ‘सुनौला’ बोलको गीतमा मेलिना राई र कोशिश क्षेत्रीको आवाज, दिनेश राउतको शब्द छ। ‘हारें हारें’ बोलको गीतमा यूवराज चौलागाइको स्वर, दिनेश राउतको शब्द छ। ‘यो के हो’ बोलको गीतमा कोशिश क्षेत्रीको स्वर, दयाराम पाण्डेको शब्द छ। ‘प्रकृतीको सुन्दर’ बोलको गीतमा मेलिना राइको आवाज र डाक्टर कृष्णहरी बरालको शब्द छ। सार्वजनिक जुक बक्समा ‘सुनौला’ बोलको गीतको अनप्लक्ड पनि समावेश छ।
फिल्मका गीत सुवास गिरी इन्टरटेन्मेन्ट र आर्यन सिग्देल इन्टरनेन्मेन्ट संयुक्त रुपमा बनाएको यस अगाडिको फिल्म ‘नोभेम्बर रेन’को संगीत भन्दा उत्कृष्ट देखिएको छ। फिल्मका गीतबाट गायिका मेलिना राईले नयाँ सफलता चुम्न सक्ने विश्वास लिइएको छ। प्रेम दिवसलाई लक्षित गरेर प्रदर्शनमा आउन लागेको यो फिल्मका गीतलाई मायालु जोडी धेरै मन पराउने निर्देशक राउतको विश्वास छ। फिल्मको गीत जस्तो दृश्यलाई पनि आकर्षक बनाउन मिहिनेत गरेको कोरियोग्राफर रेनशा राइले बताइन्।
