नर्सहरुको लिडरसिपको बिकास गर्दै उनीहरुको ब्यक्तित्व निखार्ने उदेश्यका साथ ‘मिस नेपाल पिस’को नयाँ संस्करण सुरु भएको छ। ‘सशक्त महिला, सबल राष्ट्र’ भन्ने नाराका साथ आयोजना हुँदै आएको नर्सहरु समभागी हुने स्वास्थ्य पेसासँग सम्बन्धित एकमात्र सामाजिक सौन्दर्य प्रतियोगिता हो।
अन्तर्राष्ट्रिय स्तरमै शान्तिको सन्देश फैलाउँदै नर्सिङ पेसामा आबद्ध तथा अध्ययनरतहरूलाई पेसा र समाजप्रति थप उत्तरदायित्व बोध गराउने उद्देश्यले यो प्रतियोगिता आयोजना हुँदै आएको हो।
आयोजक संस्था नेक्स्ट मोडल्स नेपालले एक विज्ञप्ति जारी गर्दै प्रतियोगिताको अडिसनबारे जानकारी दिएको हो। केही अगाडिदेखि आवेदन खुल्ला भएको प्रतियोगीताको छनौट चरणको अडिसन डिसेम्बर २० गतेबाट हुनेछ।
प्रतियोगीतामा १७ देखि २८ वर्षसम्मका देशभरका नर्स तथा नर्सिङ कलेजमा अध्ययनरत युवतीहरूले सहभागिता जनाउन सक्नेछन्। प्रतियोगीताको आवेदन फारम ‘खल्ती’ एपमा उपलब्ध छ। अडिसनको समय र भेन्यु भने केही दिनपछि जानकारी दिने बाताइएको छ।
प्रतियोगिताका शीर्ष विजेताले नगद एक लाख, थाइल्याण्डमामा आयोजना हुने ‘मिस ग्लोबल’, चीनमा हुने ‘मिस वर्ल्ड पिस’ र भियतनाममा आयोजना हुने ‘मिस प्लानेट इन्टरनेसनल’मा नेपालको प्रतिनिधित्व गर्नुका साथै ५ लाख बराबरको विभिन्न उपहारसमेत जित्न सक्नेछन्। प्रतियोगितामा विभिन्न आधा दर्जन उपविधामा समेत विजेता छानिनेछन्।
प्रतियोगिताको प्रारम्भिक चरणमा देशभरका चार दर्जन नर्सिङ कलेज तथा एक सयभन्दा बढी अस्पतालमा कार्यरत नर्सहरूको उत्साहजनक सहभागिता रहने आयोजक संस्था नेक्स्ट मोडल्स नेपालका अध्यक्ष रवि धमलाले बताएका छन्।
अडिसनबाट छानिएका सहभागीहरुलाई अन्तिम प्रतिस्पर्धाकालागी सञ्चार कला, व्यक्तित्व विकास, मोटिभेसन, लिडरसिप, ड्रेस सेन्स, पब्लिक स्पिकिङ, करियर काउन्सिलिङ लगायतका विषयमा प्रशिक्षण दिइने आयोजक संस्थाकी प्रबन्ध निर्देशक यतना पाण्डेले बताइन्।
ALSO READ: ‘मिस अर्थ २०२५’ को ट्यालेन्ट राउन्डमा नेपाललाई स्वर्ण पदक
