फिल्म ‘कंगाल करोडपति’ मा मुख्य अभिनेत्रीका रूपमा सलिना तामाङ अनुबन्धित भएकी छन्। उनी फिल्ममा अभिनेता मुकुन भुसालको साथमा देखिनेछिन्। राजु श्रेष्ठको निर्देशनमा बन्न लागेको यस फिल्ममार्फत सलिनाले नेपाली फिल्म क्षेत्रमा डेब्यू गर्ने भएकी छिन्।
निर्माण टिमका अनुसार सलिनाले यसै महिना फिल्मसँग औपचारिक सम्झौता गरेकी हुन्। यससँगै कंगाल करोडपतिमा मुकुन भुसाल र सलिना तामाङ पहिलो पटक पर्दामा जोडीका रूपमा देखिने पक्का भएको छ।
फिल्ममा अनुबन्धित भएपछि सलिनाले ‘कंगाल करोडपति’ आफ्नो डेब्यूका लागि उपयुक्त फिल्म लागेको बताएकी छन्। “यस फिल्ममा एउटा पात्रको रूपमा अभिनय गर्ने अवसर पाउँदा म अत्यन्तै खुसी छु। मेरो अभिनय र आउँदै गरेको यस फिल्मलाई सबैले धेरैभन्दा धेरै माया र साथ दिनुहुनेछ भन्ने आशा गरेकी छु,” सलिनाले प्रतिक्रिया दिँदै भनेकी छन्।
सलिनाको अभिनय यात्रामा मुम्बईको प्रशिक्षण पनि जोडिएको छ। उनले भारतको मुम्बईस्थित द एक्टर्स ट्रुथमा बलिउडका चर्चित अभिनय प्रशिक्षक तथा अभिनेता सौरभ सचदेवासँग अभिनय प्रशिक्षण लिएकी हुन्। सचदेवा रणवीर कपूर अभिनीत ब्लकबस्टर फिल्म एनिमल लगायत विभिन्न हिन्दी फिल्ममा अभिनय गरिसकेका कलाकारसमेत हुन्।
यो फिल्म सिनेमा पाठशाला प्रालिको ब्यानरमा निर्माण हुँदैछ। फिल्मका प्रस्तुतकर्ता प्रविन आचार्य हुन् भने निर्माता अनिलकुमार बुढाथोकी रहेका छन्। सहनिर्मातामा छिरिङ तामाङ, प्रबिन राई र प्रवेश सापकोटा छन्। रीता श्रेष्ठ तामाङ र सुरज कुमार लाइन प्रोड्युसरका रूपमा रहेका छन्।
फिल्मको कथा सुमन गजमेरले लेखेका हुन्। निर्माण टिमका अनुसार केही कलाकारको छनोट सम्पन्न भइसकेको छ भने केही नयाँ पात्रका लागि चाँडै अडिसन घोषणा गर्ने तयारी भइरहेको छ।
रोचक शीर्षक, मुकुन भुसालको उपस्थिति र नयाँ अभिनेत्री सलिना तामाङको डेब्यूका कारण ‘कंगाल करोडपति’प्रति दर्शकमा चासो बढ्ने देखिएको छ। फिल्मको कथा, शैली, छायांकन तालिका र बाँकी कलाकारबारे निर्माण टिमले आगामी दिनमा थप जानकारी सार्वजनिक गर्ने अपेक्षा गरिएको छ।
यो पनि पढ्नुहोस्: नेपाल-अमेरिका फिल्म महोत्सवमा ‘शेप अफ मोमो’ उत्कृष्ट फिचर फिल्म
