प्रतीक्षित फिल्म ‘टक्सिक: अ फेयरी टेल फर ग्रोन-अप्स’ को पहिलो गीत “तबाही”को भिडियो सार्वजनिक भएको छ। यश र कियारा आडवाणीलाई ग्ल्यामरस तथा रोमान्टिक अवतारमा प्रस्तुत गरिएको भिडियोमा तारा सुतारियाको छोटो तर अर्थपूर्ण उपस्थितिले फिल्मको कथाबारे नयाँ अनुमान जन्माएको छ।
गीतमा यश र कियाराबीचको सम्बन्धलाई आकर्षण, जोखिम र भावनात्मक द्वन्द्वले भरिएको शैलीमा देखाइएको छ। भव्य सेट, आकर्षक पहिरन र सिनेम्याटिक दृश्यका कारण भिडियोले सार्वजनिक भएको केही समयमै मनोरञ्जन दर्शकको ध्यान खिचेको छ।
यश र कियाराको जोडीलाई पहिलोपटक यसरी रोमान्टिक परिवेशमा देखाइएको छ। उनीहरूको पर्दाको उपस्थिति, स्टाइल र भिडियोको भव्यतालाई धेरै दर्शकले मन पराएका छन्।
अर्कोतर्फ, सामाजिक सञ्जालमा केही प्रयोगकर्ताले लामो समयदेखि गरिएको अपेक्षाअनुसार उनीहरूको केमेस्ट्री प्रभावशाली नलागेको प्रतिक्रिया पनि दिएका छन्। प्रशंसा र आलोचना दुवै भए पनि गीतले फिल्मबारेको चर्चा बढाउन भने सफल भएको छ।
भिडियोमा तारा सुतारियाको अचानक हुने उपस्थितिले कथामा अर्को भावनात्मक सम्बन्ध जोडिएको हुन सक्ने अनुमानलाई बल दिएको छ।
‘टक्सिक’को गीत ‘तबाही’ भिडियो हेर्न यहाँ क्लिक गर्नुहोस्
दर्शकले यश, कियारा र ताराका पात्रबीच प्रेम–त्रिकोण हुन सक्ने अड्कल गरिरहेका छन्। तर फिल्म निर्माण पक्षले यस्तो सम्बन्ध वा कथावस्तु आधिकारिक रूपमा सार्वजनिक गरेको छैन।
“तबाही”को हिन्दी संस्करणमा विशाल मिश्रको स्वर तथा संगीत रहेको छ। गीतका शब्द राज शेखरले लेखेका हुन्। गीत हिन्दीका साथै कन्नड, तेलुगु, तमिल र मलयालम भाषामा पनि सार्वजनिक गरिएको छ। यसअघि अडियो संस्करण आए पनि यश र कियारालाई समेटिएको भिडियोको प्रतीक्षा भइरहेको थियो।
गीतले फिल्मको मुख्य द्वन्द्व स्पष्ट नपारे पनि यशको पात्रको भावनात्मक संसारबारे केही संकेत दिन्छ। यसअघिका प्रचार सामग्रीमा एक्सन, अपराध र शक्तिको संसारलाई प्राथमिकता दिइएको थियो भने “तबाही”ले प्रेम र सम्बन्धतर्फ ध्यान मोडेको छ।
गीतु मोहनदास निर्देशित फिल्ममा यशसँगै कियारा आडवाणी, नयनतारा, हुमा कुरैशी, तारा सुतारिया र रुक्मिणी वसन्त प्रमुख भूमिकामा छन्।
‘टक्सिक: अ फेयरी टेल फर ग्रोन-अप्स’ अगस्ट २६, २०२६ मा विश्वभरका सिनेमा हलमा प्रदर्शन हुने तय गरिएको छ।
