अभिनेता धिरज मगर अर्को नयाँ नेपाली चलचित्रमा अनुबन्धित भएका छन्। ‘इन्टु मिन्टू लन्डनमा’बाट नेपाली चलचित्रमा डेब्यु गरेका धिरजले नयाँ प्रोजेक्ट साइन गरिसकेका हुन्। तर चलचित्रको नामदेखि आफ्नो भूमिकासम्मका विवरण उनले तत्काल सार्वजनिक गर्न चाहेका छैनन्।
रोचक पक्ष के छ भने गोप्य राखिएको यही चलचित्रको फस्टलुक पोस्टरका लागि आवश्यक सुटिङसमेत सम्पन्न भइसकेको धिरजले बताएका छन्।
नेपाली चलचित्रमा प्रवेश गर्नुअघि नै बेलायतमा रहँदा भ्लगिङ र युट्युब सामग्रीमार्फत धिरजले ठूलो फ्यान फलोइङ बनाइसकेका थिए। पहिलो चलचित्र ‘इन्टु मिन्टू लन्डनमा’बाटै उनले नेपाली दर्शकको ध्यान खिचे। त्यसपछि विशेषगरी युवा दर्शकमाझ उनको लोकप्रियता लगातार बढ्दै गयो।
डेब्युपछि धिरज ‘बाबरी’, ‘खुस्मा’, ‘माइतीघर’ र ‘मैझारो’लगायत चलचित्रमा देखिइसकेका छन्। उनी अभिनित ‘कुस्ती’ पनि प्रदर्शनको तयारीमा छ।
यहीबीच धिरजले अर्को चलचित्रमा अनुबन्धित भएको जानकारी दिएका हुन्। चलचित्रको नाम नखुलाए पनि फस्टलुकका लागि फोटोसुट सम्पन्न भइसकेको उनले बताएका छन्।
नयाँ प्रोजेक्टलाई लिएर आफू उत्साहित रहेको बताउने धिरज यसपटक भने चलचित्रबारे धेरै कुरा खुलाउन चाहिरहेका छैनन्। निर्माण पक्ष, निर्देशक, अभिनेत्री तथा कथावस्तुबारे पनि अहिलेसम्म कुनै विवरण सार्वजनिक गरिएको छैन।
एक लोकप्रिय कोल्डड्रिंक्सका ब्रान्ड एम्बेसडर रहेका धिरज ब्रान्ड प्रवर्द्धनका क्रममा वीरगञ्ज पुगेका बेला सञ्चारकर्मीसँगको छोटो कुराकानीमा नयाँ चलचित्रबारे बोलेका हुन्।
पछिल्ला चलचित्रमा धिरज प्रेमकथा, पारिवारिक कथा र फरक सांस्कृतिक पृष्ठभूमिका कथामा देखिँदै आएका छन्। तर नयाँ चलचित्रमा उनले कस्तो पात्र निर्वाह गर्नेछन् भन्नेबारे पनि कुनै संकेत दिएका छैनन्।
फस्टलुकको सुटिङसमेत भइसकेकाले अब निर्माण पक्षबाट चलचित्रको औपचारिक घोषणा र पोस्टर कहिले सार्वजनिक हुन्छ भन्ने चासो बढेको छ। धिरजले यसपटक दर्शकलाई कस्तो नयाँ चरित्र र कथासहित सरप्राइज दिनेछन् भन्ने थाहा पाउन भने आधिकारिक घोषणाको प्रतीक्षा गर्नुपर्नेछ।
