Biraj Bhatt and Samir Bhatt’s confrontation takes centre stage in the trailer for 12 Gaun 2
विराज भट्ट र समीर भट्टको टकरावलाई केन्द्रमा राख्दै नेपाली चलचित्र ‘१२ गाउँ २’को ट्रेलर सार्वजनिक भएको छ। मंगलबार आएको ट्रेलरमा एक्सन, अपहरण, उद्धार र बदलाका दृश्यसँगै यी दुई पात्रबीचको द्वन्द्वले कथाप्रति चासो जगाउँछ।
विराजकै निर्देशनमा बनेको चलचित्र दशैंको अवसरमा असोज ३० गतेदेखि देशव्यापी प्रदर्शनमा आउँदै छ। प्रदर्शनको तीन दिनअघि सार्वजनिक ट्रेलरले चलचित्रको एक्सन पक्षलाई अगाडि ल्याएको छ।
ट्रेलरमा विराज र समीर आक्रामक भूमिकामा देखिन्छन्। उनीहरू आमनेसामने हुने दृश्य यसको प्रमुख आकर्षण हो। तर, दुई पात्रबीचको सम्बन्ध के हो र उनीहरू किन एकअर्काविरुद्ध उभिएका छन् भन्ने कुरा ट्रेलरले स्पष्ट पारेको छैन।
अपहरण र उद्धारका घटनासँगै देखिने पारिवारिक सम्बन्धका झलकले द्वन्द्वको पछाडि व्यक्तिगत कारण पनि रहेको संकेत गर्छन्। कसलाई बचाउन संघर्ष भइरहेको छ र बदलाको कारण के हो भन्ने प्रश्न भने चलचित्रका लागि बाँकी राखिएको छ।
अनुपविक्रम शाही खलपात्रका रूपमा देखिएका छन्। विराज र समीरको टकरावबीच उनको उपस्थितिले कथामा अर्को द्वन्द्व थपेको छ। यद्यपि, तीन पात्रको उद्देश्य र उनीहरूबीचको सम्बन्धबारे प्रचार सामग्रीले धेरै खुलाएको छैन।
एक्सनलाई प्राथमिकता दिएको चलचित्रले गीतमार्फत प्रेमकथाको झलक पनि प्रस्तुत गरिसकेको छ। यसअघि सार्वजनिक ‘जुनेली’मा समीर र कृशु शाहीलाई प्रेमिल जोडीका रूपमा देखाइएको थियो। ‘लालीगुराँस’मा पनि यही जोडीको नृत्य र रोमान्स समेटिएको छ भने ‘रेशमी रुमाल’ चलचित्रको अर्को सार्वजनिक गीत हो।
यी गीत र ट्रेलरले चलचित्रमा प्रेम, पारिवारिक सम्बन्ध र प्रतिशोधलाई जोडिएको संकेत गर्छन्। गीतमा देखिएको समीरको प्रेमिल रूप र ट्रेलरको आक्रामक प्रस्तुतिले उनको पात्रका फरक पाटा अगाडि ल्याएका छन्।
चलचित्रमा विराज, समीर र अनुपविक्रमसँगै प्रकाश शाह, सुनील पोखरेल, कालु राना, खुसी कार्की र पुष्कर भट्टलगायतको अभिनय छ। कृशु शाही (काफिया) र वर्षा इटनीले यही चलचित्रबाट अभिनय यात्रा सुरु गर्दैछन्।
सन्तोष सरकारको कथा तथा पटकथा रहेको ‘१२ गाउँ २’लाई महेश पौडेलले खिचेका हुन्। चलचित्रमा बन्दे प्रसादको सम्पादन तथा युग भुसाल र डीपी खनालको संगीत छ।
रामजी लामिछाने र सियोन श्रेष्ठले नृत्य निर्देशन गरेका छन्। ट्रेलरमा प्राथमिकता पाएको एक्सनको निर्देशन भने स्टन्ट सिल्भा र शंकर महर्जनले गरेका हुन्।
चलचित्रलाई काठमाडौं उपत्यकामा गोविन्द शाहीको काफिया फिल्म्स र मोफसलमा कुवेर डिष्ट्रिब्यूसनले वितरण गर्नेछ। दशैंमा प्रदर्शन हुन लागेको ‘१२ गाउँ २’ले विराज र समीरको पर्दाको टकरावसँगै त्यसपछाडिको सम्बन्ध र बदलाको कथा प्रस्तुत गर्नेछ।
