तेस्रो अन्तर्राष्ट्रिय नेपाली फिल्म अवार्ड ‘इन्फा अवार्ड्स नेपाल–२०२६’ मा फिल्म ‘ऊनको स्विटर’ ले नौ विधामा अवार्ड जित्दै समारोहमा आफ्नो दबदबा कायम गरेको छ। शनिबार काठमाडौंमा सम्पन्न समारोहमा नीर शाह र विपिन कार्की संयुक्त रूपमा उत्कृष्ट अभिनेता घोषित हुँदा मिरुना मगरले उत्कृष्ट अभिनेत्रीको अवार्ड जितिन्। वरिष्ठ कलाकार मदनकृष्ण श्रेष्ठलाई लाइफटाइम एचिभमेन्ट अवार्ड प्रदान गरियो।
इन्फा इभेन्ट्स यूके र इन्फा इभेन्ट्स नेपालको संयुक्त आयोजनामा सम्पन्न समारोहमा नेपाली फिल्म क्षेत्रका कलाकार, निर्देशक, निर्माता, संगीतकर्मी तथा प्राविधिकहरूको उल्लेख्य सहभागिता थियो।
जुरी प्यानलमा हरिहर शर्मा, गौरी मल्ल, रमेश बुढाथोकी र करुण थापा रहेका थिए। इन्फा इभेन्ट्स यूकेका अध्यक्ष उमेश राज मोक्तानलाई शिलबन्दी नतिजा हस्तान्तरण गरेपछि अवार्ड वितरणको औपचारिक प्रक्रिया अघि बढाइएको थियो।
राष्ट्रिय गानको सामूहिक प्रस्तुतिपछि दिवंगत अभिनेता सुनिल थापाप्रति समर्पित श्रव्य–दृश्य सामग्री प्रदर्शन गरिएको थियो। त्यसपछि सांगीतिक, नृत्य तथा हास्य प्रस्तुतिसँगै अवार्ड वितरण अगाडि बढेको थियो।
अघिल्ला दुई संस्करण बेलायतमा आयोजना गरिएको इन्फा अवार्ड्सको तेस्रो संस्करण काठमाडौंमा आयोजना गरिएको हो।
‘ऊनको स्विटर’लाई नौ अवार्ड
नवीन चौहान निर्देशित ‘ऊनको स्विटर’ ले उत्कृष्ट चलचित्र, निर्देशक, अभिनेता, अभिनेत्री, पार्श्व गायिका, पार्श्व गायक, गीतकार, पटकथा तथा संगीततर्फका महत्वपूर्ण सम्मानसहित नौ अवार्ड जितेको आयोजकले जनाएको छ।
फिल्मबाट नवीन चौहान उत्कृष्ट निर्देशक, विपिन कार्की उत्कृष्ट अभिनेता र मिरुना मगर उत्कृष्ट अभिनेत्री घोषित भए।
‘काफ्ले’ गीतका लागि झुमा लिम्बु उत्कृष्ट पार्श्व गायिका बनिन् भने ‘फूलहरू’बाट सुजन चापागाईं उत्कृष्ट पार्श्व गायक घोषित भए। सोही गीतका लागि हर्क साउदले उत्कृष्ट गीतकारको अवार्ड जिते।
पटकथातर्फ नवीन चौहान र सुरज उत्कृष्ट घोषित भए।
नीर शाह र विपिन कार्की संयुक्त उत्कृष्ट अभिनेता
यस वर्ष उत्कृष्ट अभिनेता विधामा दुई कलाकारले संयुक्त रूपमा अवार्ड जिते। फिल्म ‘परान’बाट नीर शाह र ‘ऊनको स्विटर’बाट विपिन कार्की उत्कृष्ट अभिनेता घोषित भएका हुन्।
उत्कृष्ट अभिनेत्रीको अवार्ड भने ‘ऊनको स्विटर’बाट मिरुना मगरले जितिन्।
चरित्र अभिनयतर्फ ‘श्री बुकुरो’की लक्ष्मी गिरी उत्कृष्ट चरित्र अभिनेत्री र ‘हर्ष’का सन्तोष पन्त उत्कृष्ट चरित्र अभिनेता घोषित भए।
‘जेरीः अन टप’लाई तीन विधामा सफलता
प्राविधिक र अभिनय विधामा ‘जेरीः अन टप’ ले पनि उल्लेखनीय सफलता हासिल गर्यो।
फिल्मबाट निमेष रेग्मी उत्कृष्ट छायांकार, निमेष श्रेष्ठ उत्कृष्ट सम्पादक र आँचल शर्मा उत्कृष्ट सह–अभिनेत्री घोषित भए।
उत्कृष्ट सह–अभिनेताको अवार्ड भने ‘अभिमन्यू’का प्रकाश दाहालले जिते।
श्रृष्टि श्रेष्ठ उत्कृष्ट खलपात्र
फिल्म ‘द ब्लू लाइट’ बाट श्रृष्टि श्रेष्ठ उत्कृष्ट खलपात्र घोषित भइन्। यही फिल्मका लागि मोहक श्रेष्ठले उत्कृष्ट पार्श्व संगीतको अवार्ड पाए।
द्वन्द्व निर्देशनतर्फ ‘राम नाम सत्य’का श्री श्रेष्ठ उत्कृष्ट घोषित भए।
नृत्य निर्देशनतर्फ फिल्म ‘मोहर’को ‘चाहिँदैन मोहर’ गीतका लागि रामजी लामिछानेले अवार्ड जिते।
नयाँ पुस्तामा श्यामश्री शेर्पा र विमोचन दवाडी
नवकलाकारतर्फ ‘माइतीघर’की श्यामश्री शेर्पा उत्कृष्ट नव–अभिनेत्री र ‘झरीपछिको इन्द्रेणी’का विमोचन दवाडी उत्कृष्ट नव–अभिनेता घोषित भए।
नयाँ पुस्ताका कलाकारलाई समेत सम्मान गरिएको यस संस्करणले स्थापित कलाकारदेखि उदाउँदा प्रतिभासम्मलाई एउटै मञ्चमा समेटेको थियो।
इन्फा अवार्ड्स नेपाल–२०२६ का मुख्य विजेता
उत्कृष्ट चलचित्र: ‘ऊनको स्विटर’ — आर्टमाण्डु नेपाल
उत्कृष्ट निर्देशक: नवीन चौहान — ‘ऊनको स्विटर’
उत्कृष्ट अभिनेता: नीर शाह — ‘परान’ / विपिन कार्की — ‘ऊनको स्विटर’
उत्कृष्ट अभिनेत्री: मिरुना मगर — ‘ऊनको स्विटर’
उत्कृष्ट चरित्र अभिनेत्री: लक्ष्मी गिरी — ‘श्री बुकुरो’
उत्कृष्ट चरित्र अभिनेता: सन्तोष पन्त — ‘हर्ष’
उत्कृष्ट द्वन्द्व निर्देशक: श्री श्रेष्ठ — ‘राम नाम सत्य’
उत्कृष्ट खलपात्र: श्रृष्टि श्रेष्ठ — ‘द ब्लू लाइट’
उत्कृष्ट छायांकार: निमेष रेग्मी — ‘जेरीः अन टप’
उत्कृष्ट सह–अभिनेता: प्रकाश दाहाल — ‘अभिमन्यू’
उत्कृष्ट सह–अभिनेत्री: आँचल शर्मा — ‘जेरीः अन टप’
उत्कृष्ट पार्श्व संगीत: मोहक श्रेष्ठ — ‘द ब्लू लाइट’
उत्कृष्ट नव–अभिनेत्री: श्यामश्री शेर्पा — ‘माइतीघर’
उत्कृष्ट नव–अभिनेता: विमोचन दवाडी — ‘झरीपछिको इन्द्रेणी’
उत्कृष्ट पार्श्व गायिका: झुमा लिम्बु — ‘ऊनको स्विटर’ (काफ्ले)
उत्कृष्ट पार्श्व गायक: सुजन चापागाईं — ‘ऊनको स्विटर’ (फूलहरू)
उत्कृष्ट गीतकार: हर्क साउद — ‘ऊनको स्विटर’ (फूलहरू)
उत्कृष्ट पटकथा: नवीन चौहान र सुरज — ‘ऊनको स्विटर’
उत्कृष्ट सम्पादन: निमेष श्रेष्ठ — ‘जेरीः अन टप’
उत्कृष्ट नृत्य निर्देशक: रामजी लामिछाने — ‘मोहर’ (चाहिँदैन मोहर)
जुरी अवार्ड
अभिनेता: सौगात मल्ल — ‘सिटामोल’
निर्देशक: सुदीप्ता अधिकारी — ‘रमिताको पिरती’
चलचित्र: समुद्र भट्ट — ‘गुन्यु चोलो’
मदनकृष्ण श्रेष्ठलाई लाइफटाइम एचिभमेन्ट अवार्ड
समारोहको विशेष आकर्षणका रूपमा वरिष्ठ कलाकार मदनकृष्ण श्रेष्ठलाई १ लाख ११ हजार १ सय ११ रुपैयाँ नगदसहित लाइफटाइम एचिभमेन्ट अवार्ड प्रदान गरिएको थियो।
काठमाडौं महानगरपालिकाकी कार्यवाहक मेयर सुनिता डंगोल, इन्फा इभेन्ट्स यूकेका बोर्ड निर्देशक टंक भट्टराई लगायतले श्रेष्ठलाई दोसल्ला ओढाएर ताम्रपत्रसहित सम्मान गरेका थिए।
लाइफटाइम एचिभमेन्ट अवार्डलाई ओमेगा इनकर्पोरेशन्सले प्रायोजन गरेको थियो।
कविता नेपाल ‘पर्फमर अफ द इयर’, पल शाह लोकप्रिय अभिनेता
अभिनेत्री कविता नेपाललाई ‘पर्फमर अफ द इयर’ अवार्ड प्रदान गरियो भने उषा उप्रेतीले ‘इन्करेजमेन्ट अवार्ड’ प्राप्त गरिन्।
जस्सिता गुरुङ ‘जेरीः अन टप’बाट लोकप्रिय अभिनेत्री घोषित हुँदा पल शाहले लोकप्रिय अभिनेताको अवार्ड जिते।
जुरी अवार्डतर्फ ‘रमिताको पिरती’की निर्देशक सुदीप्ता अधिकारी, ‘सिटामोल’का सौगात मल्ल तथा ‘गुन्यु चोलो’की समुद्र भट्ट पुरस्कृत भए।
त्यस्तै कान्समा सफलता हासिल गरेको नेपाली फिल्म **‘एलिफेन्ट्स इन द फग’**लाई विशेष सम्मान गरिएको थियो।
मनोरञ्जनात्मक प्रस्तुतिले जम्यो समारोह
सन्दीप क्षेत्री र ओशिन सिटौलाले सञ्चालन गरेको समारोहमा संगीत, नृत्य र हास्यव्यङ्ग्यका विभिन्न प्रस्तुति समावेश थिए।
सन्दीप क्षेत्रीले वरिष्ठ अभिनेता नीर शाहकै अगाडि उनकै भेषभूषामा दिएको प्रस्तुति समारोहको रोचक आकर्षण बन्यो। ‘कमेडी दरबार’का कलाकारहरूको प्रस्तुति पनि कार्यक्रममा समावेश थियो।
समारोहमा दीया मास्के, पल शाह, कविता नेपाल, उषा उप्रेती, तेरिया मगर, एलिशा शर्मा र समर्पणलगायत कलाकारले प्रस्तुति दिए। बाबुल गिरी तथा रिहानले सांगीतिक प्रस्तुति दिएका थिए।
कार्यक्रमको आन्तरिक व्यवस्थापनदेखि स्क्रिप्ट लेखनसम्मको जिम्मेवारी इन्फा इभेन्ट्स यूकेका बोर्ड निर्देशक आशिष पन्तले सम्हालेका थिए।
कार्यक्रमको अन्त्यमा बोर्ड निर्देशक पाल्देन लामाले सहभागी कलाकार, अतिथि तथा दर्शकलाई धन्यवाद दिँदै नेपालमा पहिलो पटक आयोजना गरिएको इन्फा अवार्ड्सको संस्करण सफल बनाउन सहयोग गर्ने सबैप्रति आयोजकका तर्फबाट आभार व्यक्त गरे।
