आकाशको एउटा पोस्टले खोल्यो करुणासँगको प्रेम सम्बन्ध र अब बिवाहको संकेत

नेपाली फिल्म तथा म्युजिक भिडियोका चर्चित अभिनेता आकाश श्रेष्ठले वर्षौंदेखि चल्दै आएको प्रेम चर्चालाई अन्ततः सार्वजनिक गरेका छन्। अभिनेत्री तथा मोडल करुणा श्रेष्ठसँग रोमान्टिक तस्वीर शेयर गर्दै उनले उनीहरूको सम्बन्धले पाँच वर्ष पूरा गरेको खुलाएका हुन्।

आकाशले इन्स्टाग्राममार्फत करुणासँग बिताएको पाँच वर्षको साथ सम्झिँदै आगामी जीवन पनि एकअर्कासँगै बिताउने चाहना व्यक्त गरेका छन्। ‘लाइफटाइम’ अर्थात् जीवनभरको साथको भाव बोकेको उनको पोस्टपछि लामो समयदेखि चर्चामा रहेको उनीहरूको प्रेम अब अनुमानमा मात्र सीमित रहेन।

आकाश र करुणाको निकटतालाई नजिकबाट नियालिरहेका प्रशंसकका लागि भने यो पोस्ट खासै अप्रत्याशित थिएन। दुवैको अनस्क्रिन केमेस्ट्रीदेखि सामाजिक सञ्जालमा देखिने आत्मीयतासम्मले उनीहरूको सम्बन्धबारे धेरै अघिदेखि नै प्रश्न उठाउँदै आएको थियो।

वर्षौंदेखि चलिरहेको थियो प्रेमको चर्चा

आकाश र करुणाको सम्बन्धलाई लिएर मनोरञ्जन वृत्तमा लामो समयदेखि चर्चा हुँदै आएको थियो। उनीहरूले लगातार म्युजिक भिडियोमा सहकार्य गर्दै आएका छन्। पर्दामा देखिने उनीहरूको जोडीलाई दर्शकले रुचाउँदै गर्दा पर्दाबाहिरको निकटताले पनि प्रेमको चर्चा थप बलियो बनायो।

सन् २०२३ मै उनीहरूको सम्बन्धलाई लिएर मनोरञ्जन सञ्चारमाध्यममा समाचार आएका थिए। तर त्यतिबेला आकाशले करुणासँगको सम्बन्धलाई खुलेर प्रेमको नाम दिएका थिएनन्।

त्यसपछि जन्मदिनका शुभकामना, सँगैका तस्वीर र सामाजिक सञ्जालमा देखिएका व्यक्तिगत अभिव्यक्तिले उनीहरूबीचको विशेष सम्बन्धको संकेत दिइरहे। अब भने पाँच वर्षको साथबारे आकाश आफैंले पोस्ट गरेपछि उनीहरूको प्रेमलाई लिएर चलिरहेको चर्चाले स्पष्ट आधार पाएको छ।

म्युजिक भिडियोको सहकार्यबाट प्रेमसम्म

आकाश र करुणा म्युजिक भिडियोमा काम गर्ने क्रममा नजिकिएको बताइएको छ। सहकार्यबाट सुरु भएको उनीहरूको मित्रता विस्तारै प्रेममा परिणत भएको थियो। पछिल्ला पाँच वर्षमा उनीहरू दर्जनौं म्युजिक भिडियोमा सँगै देखिइसकेका छन्।

करुणाले फिल्म ‘सयकडा दश’ बाट अभिनेत्रीका रूपमा डेब्यु गरेकी थिइन्। त्यसपछि उनी विशेषगरी म्युजिक भिडियोमा सक्रिय रहिन्। आकाश पनि नेपाली फिल्मसँगै म्युजिक भिडियोमा लगातार सक्रिय छन्। बारम्बार सँगै पर्दामा देखिने यो जोडीको वास्तविक जीवनको सम्बन्ध भने दर्शकका लागि लामो समयदेखि चासोको विषय बनेको थियो।

के अब विवाहको तयारीमा छन् आकाश र करुणा?

आकाशको पछिल्लो पोस्टले प्रेम पुष्टि मात्रै गरेन, विवाहको चर्चासमेत सुरु गराएको छ। उनले करुणासँग ‘लाइफटाइम’ अर्थात् जीवनभर साथ रहने भाव व्यक्त गरेपछि प्रशंसकमाझ उनीहरूको सम्बन्ध अब विवाहतर्फ अघि बढेको हो कि भन्ने प्रश्न उठेको हो।

स्रोतका अनुसार आकाश र करुणाले यसै वर्ष विवाह गर्ने योजना बनाएको र दुवै परिवारबाट समेत सम्बन्धमा सहमति रहेको बताएको छ। तर अहिलेसम्म आकाश वा करुणा कसैले पनि विवाहको मिति सार्वजनिक गरेका छैनन्। विवाहबारे औपचारिक घोषणा पनि भएको छैन।

त्यसैले उनीहरू विवाहको तयारीतर्फ अघि बढिरहेको हुनसक्ने रिपोर्ट आए पनि विवाह निश्चित भइसकेको निष्कर्ष निकाल्नु अहिले नै हतार हुनेछ।