अनमोल केसी अभिनीत नेपाली चलचित्र ‘बाटुलो जून’को टिजर सार्वजनिक भएको छ। सनराइज पिक्चर्सले सार्वजनिक गरेको पहिलो दृश्य सामग्रीले फिल्मको पूरा कथा नखोली पुरानो समयको प्रेम, सामाजिक परिवेश र पात्रहरूको भावनात्मक संसारको झलक दिएको छ।
करिब तीन दशकअघिको समयलाई पृष्ठभूमि बनाइएको ‘बाटुलो जून’ एउटा आदर्श प्रेमकथामा केन्द्रित फिल्म हो। टिजरमा पनि कथाभन्दा बढी त्यही समयको परिवेश, जीवनशैली र प्रेम व्यक्त गर्ने शैलीलाई प्राथमिकता दिइएको देखिन्छ।
आजको प्रविधिमैत्री र तीव्र गतिमा बदलिएको प्रेम सम्बन्धभन्दा फरक, फिल्मले अघिल्लो पुस्ताले अनुभव गरेको प्रेम र सामाजिक सम्बन्धलाई पर्दामा उतार्ने प्रयास गरेको छ। टिजरका दृश्यहरूले ग्रामीण परिवेश, पात्रहरूको सम्बन्ध र पुरानो समयको अनुभूति दिने वातावरणलाई अगाडि ल्याएका छन्।
चलचित्रलाई अभिनेता तथा निर्माता भुवन केसीले निर्देशन गरेका हुन्। यसअघि ‘ड्रिम्स’ निर्देशन गरेका भुवनले उक्त फिल्ममा आधुनिक पुस्ताको प्रेमकथा प्रस्तुत गरेका थिए। ‘बाटुलो जून’मा भने उनी आफ्नो सिनेमायी यात्रासँग समेत जोडिएको पुरानो समयतर्फ फर्किएका छन्।
भुवन केसी स्वयं नेपाली चलचित्रमा लामो समयसम्म रोमान्टिक नायकका रूपमा लोकप्रिय रहे। उनले अभिनय गरेका धेरै फिल्ममा प्रेमकथा महत्वपूर्ण हिस्सा रहन्थ्यो। त्यसैले ‘बाटुलो जून’मा अनमोल केसीलाई लिएर त्यही कालखण्डको प्रेम र संवेदनालाई नयाँ पुस्तामाझ पुनः प्रस्तुत गर्नु फिल्मको रोचक पक्ष बनेको छ।
भुवनका अनुसार ‘बाटुलो जून’ केवल पुरानो समयको कथा होइन, उनको आफ्नै सिनेमायी यात्रासँग पनि जोडिएको फिल्म हो। आफूले पर्दामा जिएका प्रेमकथाको समय र अनुभूतिलाई नयाँ पुस्ताका लागि फेरि सिर्जना गर्ने प्रयास यस फिल्ममा गरिएको छ।
फिल्ममा अनमोल केसी मुख्य भूमिकामा छन् भने भुवन केसी पनि महत्वपूर्ण भूमिकामा देखिनेछन्। ‘बाटुलो जून’बाट प्रिन्सी खतिवडाले नेपाली चलचित्रमा डेब्यु गर्दैछिन्।
अभिनेत्री गरिमा पन्तको पुनरागमन पनि फिल्मको अर्को आकर्षण हो। लामो समयदेखि बेल्जियममा बस्दै आएकी गरिमा यस फिल्ममार्फत पुनः नेपाली चलचित्रको पर्दामा फर्किएकी हुन्।
चलचित्रको कथा सामीप्यराज तिमल्सेना र सरिन पोखरेलले लेखेका हुन्। राजेश श्रेष्ठको छायांकन रहेको फिल्मलाई कृष्ण भण्डारीले सम्पादन गरेका छन् भने रोमन बज्राचार्यले पार्श्व संगीत दिएका छन्। प्रदीप श्रेष्ठ एसोसिएट निर्देशक हुन्।
जिया केसी र भविष्य खड्काले निर्माण गरेको ‘बाटुलो जून’मा विवेक थापा सह-निर्माताका रूपमा रहेका छन्।
चलचित्र आगामी कार्तिक २६ गतेबाट देशव्यापी प्रदर्शनमा आउने तयारीमा छ। टिजर सार्वजनिक भएसँगै निर्माण पक्षले अब फिल्मको प्रचार अभियानलाई थप तीव्र बनाउने संकेत गरेको छ।
