Capturing the spirit of Kukur Tihar: Nepal Tourism Board’s reel contest invites creators to celebrate the bond between people and dogs, with a prize of NPR 100,000.
कुकुर तिहारको माया, सम्मान र आत्मीयतालाई भिडियोमा उतार्नेहरूका लागि नेपाल पर्यटन बोर्डले एक लाख रुपैयाँ पुरस्कारसहित रिल प्रतियोगिता घोषणा गरेको छ। ‘कुकुर तिहार रिल प्रतियोगिता २०२६’ मा सहभागी हुन नोभेम्बर २१ सम्म भिडियो पठाउन सकिनेछ।
प्रतियोगिताले कुकुर तिहारको सांस्कृतिक महत्त्व र मानिससँग कुकुरको सम्बन्धलाई सिर्जनात्मक भिडियोमार्फत प्रस्तुत गर्ने अवसर दिएको छ। कुकुरलाई टीका र सयपत्रीको माला लगाइदिएका दृश्यदेखि उनीहरूसँग बिताएका आत्मीय क्षणसम्मलाई रिलको विषय बनाउन सकिन्छ।
सहभागीले बनाएको भिडियो मौलिक हुनुपर्नेछ। साथै, कुकुर तिहारको भावना र विशेषता सिर्जनात्मक रूपमा झल्किनुपर्नेछ।
कसरी सहभागी हुने?
सबैभन्दा पहिले कुकुर तिहारसँग सम्बन्धित मौलिक र आकर्षक रिल तयार गरी आफ्नो इन्स्टाग्राम वा फेसबुक खातामा पोस्ट गर्नुपर्नेछ।
पोस्टमा #NepalFestival र #KukurTihar ह्यासट्याग अनिवार्य प्रयोग गर्नुपर्छ। इन्स्टाग्राममा @nepaltourism लाई र फेसबुकमा नेपाल पर्यटन बोर्डको आधिकारिक पेजलाई ट्याग गर्नुपर्नेछ।
त्यसपछि आफ्नो भिडियो र गुगल ड्राइभ लिंक photonepal@ntb.org.np मा इमेलमार्फत पठाउनुपर्छ। ड्राइभमा राखिएको भिडियो हेर्न र डाउनलोड गर्न मिल्ने अनुमति खुला गरिएको हुनुपर्नेछ। सामाजिक सञ्जालमा पोस्ट गरेर मात्र सहभागिता प्रक्रिया पूरा हुँदैन।
अंग्रेजी सबटाइटल वा भ्वाइसओभर चाहिने
प्रतियोगिताका लागि रिल अंग्रेजी भाषामा हुनुपर्ने सर्त छ। भिडियोमा अंग्रेजी सबटाइटल वा अंग्रेजी भाषाको भ्वाइसओभर राखेर यो सर्त पूरा गर्न सकिन्छ।
यसले नेपाली पर्व र मानिस–कुकुरबीचको सम्बन्धलाई अन्तर्राष्ट्रिय दर्शकले पनि बुझ्न सक्ने गरी प्रस्तुत गर्ने अवसर दिन्छ।
भिडियो प्रयोगसम्बन्धी सर्त
नेपाल पर्यटन बोर्डले प्रतियोगितामा प्राप्त सबै रिल आफ्ना प्रचारप्रसार, बजारीकरण तथा डिजिटल सञ्चारका विभिन्न माध्यममा प्रयोग गर्न सक्नेछ। यो सर्त पुरस्कार प्राप्त गर्ने भिडियोमा मात्र सीमित छैन।
प्रतियोगिताको घोषित पुरस्कार एक लाख रुपैयाँ हो। सहभागीले नोभेम्बर २१, २०२६ भित्र तोकिएका प्रक्रिया पूरा गरी भिडियो पठाउनुपर्नेछ।
