काठमाडौं । पछिल्लो पुस्ताकी व्यस्त नायिका प्रियंका कार्कीले आफ्नो प्रतिभालाई विस्तारै बाहिर ल्याउँदैछिन् । कुशल अभिनयसँगै कोरियोग्राफी पनि उत्तिकै गर्ने उनी अब श्रोता र दर्शकमाझ गायिकाको रुपमा आउँदैछिन् । फिल्म ‘मेरो बेष्ट फ्रेण्ड’बाट अभिनयमा डेब्यु गरेकी प्रियंकाले यो फिल्मसँगै ‘पुन्टे परेड’, ‘मिसन पैसा २’ र ‘लुटेरा’मा पनि कोरियोग्राफी गरेकी छन्। उनले गत वर्ष आफु प्रमुख भूमिकामा रहेको फिल्म फिल्म ‘आवरण’ को टाइटल गीतमा स्वर भरिन ।
सानै देखि अभिनय र नृत्यसंगै गायनमा रमाउने प्रियंकाले एसएलसी पछी भने अभिनयलाई मात्र प्राथमिकता दिईन । ‘एसएलसी पछी पढाइमा व्यस्त हुनु पर्ने भएकाले मैले अभिनयलाई मात्र अगाडी बढाउन सके तर अब बिस्तारै आफुमा रहेका प्रतिभालाई अगाडी ल्याउने छु ।’ प्रियंकाले खुलाईन् ।
उनले आफ्नै स्वरमा ‘तिम्ले त हैन’बोलको गीत तयार पारेकी छन् । प्रियंकाले पुराना गायक बच्चु कैलाशले गाएको चर्चित गीत ’तिम्ले त हैन’लाई कभर भर्सन सङका रुपमा गाएकी हुन् । यो गीतका संगीतकार नातिकाजी र रचनाकार क्षेत्रप्रताप अधिकारी हुन् ।
गीतलाई शैलेश श्रेष्ठले रिएरेञ्ज र सोनम पाख्रिनले गीतारमा साथ दिएका छन् । यस गीतको भिडियोलाई सुशन प्रजापतिले खिचेका हुन् भने सम्पादन उज्वल ढकालले गरेका छन् । टाइनी बट बिग पिक्चर्सले तयार पारेको यस गीतको भिडियो छिटै नै युट्युब तथा टेलिभिजनमा हेर्न पाइने प्रियंकाले जनाईन् ।
