ग्ल्यामर नेपाल,
गत भदौ ६ गते प्रदर्शन मिति तोकेको फिल्म ‘सम्बोधन’ले श्रावण २३ गते रिलिज भएको स्व.श्रीकृष्ण श्रेष्ठको फिल्म ‘कोहिनुर’ ले राम्रो व्यापार गरेर हलबाट बाहिरिने सम्भावना नरहेपछि फिल्मले आफ्नो रिलिज मिति सारेको थियो। ‘सम्बोधन’ आगामी माघ १६ गते रिलिज हुने भएको छ। सम्बोधनले हालै फिल्मको नयाँ पोस्टर र यु ट्युबमा नयाँ ट्रेलर समेत सार्वजनिक गरेको छ।
फिल्मलाई ‘होस्टल’ तथा ‘जेरी’ निर्देशक हेमराज विसीले निर्देशन गरेका हुन्। ‘सम्बोधन’मा नम्रता श्रेष्ठ, दयाहाङ राई, विनय भट्ट, प्रशान्त ताम्राकारले मुख्य पात्रको रुपमा अभिनय गरेका छन्। निर्देशक हेमराज विसी निर्देशित अघिल्ला फिल्महरु ‘होस्टल’ र ‘जेरी’ले नेपाली फिल्मी बजारमा राम्रो व्यापार गरिसकेकाले यो फिल्मले पनि राम्रो व्यापार गर्ने अनुमान गरिएको छ। फिल्मलाई सरोज न्यौपानेले निर्माण गरेका हुन।