Paritoshika Panta
चर्चित गायिका अञ्जु पन्तकी छोरी पारितोषिका पन्त अब ठूलो पर्दामा देखिने भएकी छन्। निर्देशक अमरदीप सापकोटाको आगामी फिल्म ‘तीन तिघ्रे, क्या बिग्रे’ मा उनी शीर्ष भूमिकाका लागि अनुबन्धित भएकी हुन्।
निर्माण पक्षका अनुसार पारितोषिकासँग सोमबार औपचारिक लिखित सम्झौता गरिएको छ। निर्देशक सापकोटाले पारितोषिकालाई नयाँ र ताजा अनुहारका रूपमा फिल्ममा लिइएको बताएका छन्।
सापकोटाका अनुसार केही समयअघि पारितोषिकाले अभिनय गरेको नाटक ‘स्वर्णदेश’ हेरेपछि उनीप्रति निर्माण टिमको ध्यान गएको थियो। नाटकमा उनको अभिनय हेरेपछि अञ्जु पन्तसँग यसबारे कुराकानी भएको र त्यसपछि निर्माण टिमले उनलाई फिल्मका लागि प्रस्ताव गरेको उनले बताएका छन्।
पारितोषिका केही समयदेखि मण्डला थिएटरमा अभिनय सिकिरहेकी थिइन्। रंगमञ्चबाट अभिनयको प्रारम्भिक अभ्यास गरेकी उनको फिल्म यात्रा अब ‘तीन तिघ्रे, क्या बिग्रे’ मार्फत सुरु हुँदैछ। गायिका अञ्जु पन्तकी छोरी भएका कारण पारितोषिकाको फिल्म प्रवेशले नेपाली मनोरञ्जन क्षेत्र र दर्शकमाझ स्वाभाविक चासो बढाउने देखिएको छ।
रोचक कुरा के छ भने यही फिल्मबाट लोकप्रिय गायक पशुपति शर्माले पनि अभिनयमा डेब्यू गर्दैछन्। गीतसंगीतमा बलियो पहिचान बनाएका शर्माको फिल्म अभिनय कस्तो हुनेछ भन्ने जिज्ञासा पनि फिल्मप्रति आकर्षण बढाउने अर्को कारण बन्न सक्छ।
रघुनाथ सापकोटाले निर्माण गर्ने यो फिल्मको छायांकन असार २८ गतेदेखि सुरु हुने तयारी छ। निर्माण टिमका अनुसार फिल्मको छायांकन कीर्तिपुर र काभ्रेको पनौती क्षेत्रमा गरिनेछ। अहिले फिल्म प्रि–प्रोडक्सन चरणमा रहेको बताइएको छ।
नेपाली फिल्ममा नयाँ अनुहार भित्रिने क्रम बढिरहेका बेला पारितोषिकाको आगमनलाई पनि नयाँ पुस्ताको सम्भावनासँग जोडेर हेरिएको छ।
यो पनि पढ्नुहोस्: लोकदोहोरीका स्टार पशुपति शर्मा अब ठूलो पर्दामा, ‘तीन तिघ्रे, क्या बिग्रे’बाट फिल्म अभिनयमा डेब्यु गर्दै
