निर्देशक प्रवेश पौडेलको नयाँ फिल्म ‘मायालु’मा अभिनेत्री आकृति बुढाथोकी मुख्य भूमिकाका लागि अनुबन्ध भएकी छन्। नाट्य क्षेत्र र मोडलिङ हुँदै अभिनयमा प्रवेश गरेकी आकृतिका लागि यो दोस्रो फिल्म हुनेछ।
यसअघि उनले फिल्म ‘मुक्तिपुर’मा अभिनय गरेकी थिइन्। दोस्रो फिल्ममै मुख्य अभिनेत्रीका रूपमा अवसर पाएकी आकृति अब ‘मायालु’मार्फत पर्दामा नयाँ भूमिकामा देखिने भएकी छन्।
‘अमेरिका बोइज’ र ‘बिहे पास’ निर्देशन गरिसकेका प्रवेश पौडेलको यो तेस्रो फिल्म हो। त्रिकोणात्मक प्रेमकथामा निर्माण हुन लागेको फिल्मको कथा निर्देशक पौडेल स्वयंले लेखेका हुन् भने पटकथा अनिल कुर्मीको छ।
फिल्ममा आकृतिसँगै कबीर खड्का मुख्य भूमिकामा रहनेछन्। अर्को सहायक अभिनेत्रीको भने खोजी भइरहेको निर्माण पक्षले जनाएको छ।
‘मायालु’को छायांकन नेपाल र अस्ट्रेलियामा गरिनेछ। छायांकनको जिम्मेवारी शरद महतोले सम्हाल्नेछन् भने संगीत अनमोल थापाको रहनेछ।
सितारा र कबीर खड्का फिल्म्सको ब्यानरमा निर्माण हुने फिल्मका निर्माता सुरेन्द्र रावल हुन्। निर्माण टोलीका अनुसार दशैँपछि अस्ट्रेलियाबाट फिल्मको छायांकन सुरु गर्ने तयारी गरिएको छ।
फिल्मको नाम सुरुमा ‘मेरो अधुरो प्रेम’ राखिएको थियो। पछि नाम परिवर्तन गरेर ‘मायालु’ राखिएको हो। निर्देशक पौडेलका अनुसार ‘मायालु’ प्रदर्शनपछि ‘मेरो अधुरो प्रेम’ शीर्षकमै अर्को फिल्म निर्माण गर्ने तयारीसमेत छ।
