अस्ट्रेलियाली संसदको थिएटरमा पहिलो पटक नेपाली फिल्म प्रदर्शन हुने
अन्तर्राष्ट्रिय स्तरमा चर्चा र पुरस्कार जितेको नेपाली फिल्म ‘एलिफेन्ट्स इन द फग’ (Elephants in the Fog) अब अस्ट्रेलियाको संसद भवनमा प्रदर्शन हुने भएको छ। अविनाश विक्रम शाह निर्देशित फिल्म आगामी अक्टोबर २६, २०२६ मा अस्ट्रेलियाको राजधानी क्यानबेरास्थित संघीय संसद भवनको थिएटरमा विशेष प्रदर्शन गरिने भएको हो।
आयोजकका अनुसार अस्ट्रेलियाको संघीय संसद भवनभित्र रहेको थिएटरमा नेपाली फिल्म प्रदर्शन हुन लागेको यो पहिलो अवसर हुनेछ।
यो विशेष कार्यक्रम अस्ट्रेलिया–नेपाल संसदीय मैत्री समूहको आयोजनामा हुन लागेको हो। कार्यक्रमलाई क्यानबेरास्थित नेपाली राजदूतावास र फेडरेसन अफ नेपाली कम्युनिटी एसोसिएसन्स अफ अस्ट्रेलिया (FeNCA) ले सहयोग गर्नेछन्। कार्यक्रम व्यवस्थापनको जिम्मेवारी स्पिडविङ्स प्रालि अस्ट्रेलियाले लिएको छ।
प्रदर्शनमा अस्ट्रेलियाली संसदका सदस्य, कूटनीतिक प्रतिनिधि, नेपाली समुदायका अगुवा, पत्रकार तथा विभिन्न क्षेत्रका विशिष्ट व्यक्तिहरूको उपस्थिति रहने अपेक्षा गरिएको छ।
नेपाली सिनेमाको प्रवर्द्धनसँगै मानवीय सहयोग
यस पटकको विशेष प्रदर्शन फिल्मको अन्तर्राष्ट्रिय प्रवर्द्धनमा मात्र सीमित रहने छैन। कार्यक्रममार्फत मानवीय सहायताका लागि रकमसमेत संकलन गरिने भएको छ।
स्पिडविङ्सका प्रमुख कार्यकारी अधिकृत शान्ति ढकालका अनुसार नेपाली सिनेमालाई अन्तर्राष्ट्रिय दर्शकमाझ पुर्याउनु, मानवीय सेवाका लागि सहयोग जुटाउनु र नेपाल–अस्ट्रेलियाबीचको सांस्कृतिक सम्बन्ध थप मजबुत बनाउनु कार्यक्रमका मुख्य उद्देश्य हुन्।
आयोजकका अनुसार कार्यक्रमबाट नेपालको प्रधानमन्त्री राहत कोष र अस्ट्रेलियाको इमर्जेन्सी एक्सन एलायन्सका लागि सहयोग जुटाइनेछ।
कार्यक्रमस्थलमा राखिने क्यूआर कोड स्क्यान गरेर इच्छुक सहभागीले स्वेच्छिक आर्थिक सहयोग गर्न सक्नेछन्।
इमर्जेन्सी एक्सन एलायन्स अस्ट्रेलियाका १५ वटा मानवीय सहायता संस्थाहरूको साझा सञ्जाल हो, जसले अन्तर्राष्ट्रिय विपद्का बेला राहतका लागि रकम संकलन र परिचालन गर्छ।
कान्समा इतिहास रचेको नेपाली फिल्म
क्यानबेरामा प्रदर्शन हुन लागेको ‘एलिफेन्ट्स इन द फग’ ले यसअघि फ्रान्समा आयोजित २०२६ को कान्स फिल्म फेस्टिभलमा ऐतिहासिक सफलता हासिल गरेको थियो।
फिल्मले कान्सको ‘अन सर्टेन रिगार्ड’ विधामा जुरी पुरस्कार जितेको थियो। यो पुरस्कार जित्ने पहिलो नेपाली फिचर फिल्म बनेर यसले अन्तर्राष्ट्रिय चलचित्र क्षेत्रमा नेपालको उपस्थिति बलियो बनाएको थियो।
फिल्मले उत्कृष्ट ध्वनि सिर्जनाका लागि पनि सम्मान प्राप्त गरेको थियो।
अविनाश विक्रम शाहको लेखन तथा निर्देशन रहेको फिल्मको कथा जंगली हात्तीको जोखिम रहेको वनक्षेत्र नजिक बसोबास गर्ने किन्नर समुदायको जीवनमा केन्द्रित छ।
कथाको मुख्य पात्र पिरती आफ्नो समुदायकी एक युवती बेपत्ता भएपछि उनको खोजीमा निस्किन्छिन्। यस क्रममा उनले व्यक्तिगत प्रेम, स्वतन्त्रता र समुदायप्रतिको जिम्मेवारीबीच कठिन निर्णय लिनुपर्ने अवस्था आउँछ।
पुष्पा थिङ लामाको मुख्य अभिनय रहेको फिल्मले पहिचान, सामाजिक विभेद, प्रेम र अपनत्वजस्ता विषयलाई प्रस्तुत गरेको छ।
कान्समा प्राप्त सफलताले फिल्मलाई अन्तर्राष्ट्रिय पहिचान दिलाउनुका साथै नेपाली फिल्मकर्मीका लागि नयाँ सम्भावनाका ढोका खोलेको छ।
नोभेम्बरमा अस्ट्रेलियाका अन्य सहरमा पनि प्रदर्शनको तयारी
क्यानबेराको विशेष प्रदर्शनपछि आगामी नोभेम्बर महिनामा अस्ट्रेलियाका प्रमुख सहरहरूमा पनि फिल्म प्रदर्शन गर्ने तयारी भइरहेको आयोजकले जनाएका छन्।
ती प्रदर्शनमार्फत थप दर्शकसम्म नेपाली फिल्म पुर्याउनुका साथै मानवीय सहायताका लागि रकम संकलनलाई निरन्तरता दिने योजना छ।
अस्ट्रेलियामा बसोबास गर्ने नेपाली समुदायका लागि पनि यो कार्यक्रम विशेष महत्त्वको हुने अपेक्षा गरिएको छ।
कान्स फिल्म फेस्टिभलमा सफलता हासिल गरेको नेपाली कथाले अब अस्ट्रेलियाको संसद भवनसम्म पुग्ने अवसर पाएको छ। सिनेमा, सांस्कृतिक सम्बन्ध र मानवीय सहयोगलाई एउटै मञ्चमा जोड्ने यो पहलले नेपाली फिल्मको अन्तर्राष्ट्रिय यात्रालाई थप विस्तार गर्ने विश्वास गरिएको छ।
