
Pradeep Timalsina and Smriti Rawat in a promotional image for Mere Yara, a Hindi music video directed by Nitin Chand that is set to air on community television networks in Australia.
नेपाली निर्देशक नितिन चन्दले निर्देशन गरेको हिन्दी म्युजिक भिडियो अस्ट्रेलियाका सामुदायिक टेलिभिजनमार्फत दर्शकमाझ पुग्ने भएको छ। अस्ट्रेलियामा बस्दै आएका नेपाली कलाकार प्रदीप तिमल्सिना र भारतकी स्मृति रावत अभिनीत भिडियो मेलबर्नको च्यानल ३१, एडिलेडको च्यानल ४४ र कम्युनिटी प्लसलगायतका सञ्जालमा प्रसारण गर्ने तयारी भएको हो।
निर्देशक चन्दका अनुसार प्रसारणका लागि सामुदायिक टेलिभिजन अस्ट्रेलियाका शोन डनलपसँग हालै सहमति भएको छ। उक्त सहमतिअनुसार यी च्यानलसँगै तिनका अन्य प्रसारण सञ्जालबाट पनि भिडियो देखाइनेछ।
भिडियोमा प्रदीपसँग अभिनय गरेकी स्मृति भारतको देहरादूनकी हुन्। उनी मिस उत्तराखण्डको उपाधि विजेता हुन्। नेपाली निर्देशक र नेपाल तथा भारतका कलाकार जोडिएको यो भिडियो नयाँ दिल्लीका विभिन्न स्थानमा छायाङ्कन गरिएको हो।
भिडियो निर्माणको व्यवस्थापन लाइन निर्माता राजेन्द्र घिमिरेले सम्हालेका थिए। उपलब्ध निर्माण विवरणअनुसार उनले यसअघि ‘तेन्जिन’, ‘इन्डियन २’, ‘इन्डियन ३’ र ‘जेलर २’ जस्ता चलचित्र परियोजनामा काम गरेका छन्।
भारतमा छायाङ्कन गरिएको हिन्दी गीतको भिडियो अस्ट्रेलियाका टेलिभिजनसम्म पुग्न लागेसँगै यसमा संलग्न नेपाली कलाकार र प्राविधिकको कामले थप दर्शक पाउने भएको छ। विशेषगरी अस्ट्रेलियामा रहेका नेपाली समुदायसँगै त्यहाँका बहुसांस्कृतिक दर्शकमाझ पनि भिडियो पुग्ने अपेक्षा छ।











