एक्शन भूमिकामा देखिदै राज आर्यन

नायक राज आर्यन अब एक्शन चलचित्र लिएर पुन चलचित्रमा कमब्याक गर्ने भएका छन। ‘लभ यु म्यान’ र ‘चियर्स’ जस्ता फिल्महरुमा नायक भएर देखा परिसकेका राज आर्यन अब पीएनपी मिडिया हाउस को ब्यानरमा निर्माण हुन लागेको अनटाईटल्ड नयाँ फिल्ममा एक्शन अवतार देखिदै छन्।

बिगत चार बर्ष देखि अस्ट्रेलियामा रहँदै आएका उनि नेपाल फर्केर यतिबेला फिल्मकालागि अहिले धमाधम द्वन्द र बडी बिल्डिंगका साथै नृत्यको अभ्यास गरिरहेका छन्।

अलग धारका फिल्ममा काम गर्न रुचाउने राजले यस चलचित्र अघि सस्पेन्स थ्रिलर फिल्म ‘पापी रात’, समलिंगी मनोविज्ञानमा आधारित फिल्म ‘लभ यू म्यान’, डार्क कमेडी फिल्म ‘चीयर्स’ र त्रिकोणात्मक लभ स्टोरी फिल्म ‘स्पर्श’मा अभिनय गरिसकेका छन्।

प्राय लभस्टोरी भूमिकामा लभर ब्वाईको रुपमा देखिने राज आर्यन यसपटक भने पूर्ण एक्सन भूमिकामा देखिदै छन्। डेढ करोडको बजेटमा निर्माणहुन लागेको यो फिल्ममा निर्माताको रुपमा नायक तथा कलाकार पुस्करजंग थापाले लगानी गर्ने भएका छन। भारतमा ब्रिटिश साम्राज्यवादको युगमा भएको नेपालीहरुको सत्य घटनामा आधारित उक्त चलचित्रको स्क्रिप्ट निर्माता पुस्करजंग थापाले नै तयार पारेका हुन्।

नेपाली फिल्ममा बढ्दो आधुनिक प्रबिधिको प्रयोग हुन थालेसँगै यस फिल्ममा पनि भीएफएक्स, क्यामरा वर्कस तथा एक्सन सिक्वेन्सहरुमा जोड दिइने निर्माण पक्षले बताएको छ। चलचित्रमा नायकका रुपमा राज आर्यन अनुबन्धित भइसकेका छन् तर नायिका को हुने हुन् तय भईसकेको छैन। फिल्मका लागि उत्कृस्ट निर्देशकको खोजीमा निर्माण पक्ष लागिरहेको छ।