विशारद बस्नेतको निर्देशनमा निर्माण भएको नेपाली चलचित्र ‘मिस्टर भर्जिन’को ’टुल्की’ बोलको गीतको भिडियो रिलिज भएको छ। केही दिन अघि मात्र अडियो भर्सन रिलिज गरिएको गीतको भिडियो काठमाडौँमा एक कार्यक्रमका बीच भिडियो रिलिज गरिएको हो। गीतमा सुरज पण्डितको स्वर, शब्द र सङ्गीत सुन्न सकिन्छ। भिडियोमा चलचित्रका मुख्य कलाकारहरू गौरव पहारी, विजय बराल, कमलमणि नेपाल, भोलाराज सापकोटा, रविन्द्र झाको साथै श्रद्धा प्रसाई, स्मिृती पोख्रेल र इलियन मरान्डाको अभिनय छ।
तीन युवाको यौन मनोविज्ञानको कथालाई लिएर निर्माण भएको ‘मिस्टर भर्जिन’मा खिलेन्द्र तिमल्सिना, प्रजापति सिवाकोटी, मुकेश रेग्मी र बिशारद बस्नेतले लगानी गरेका छन्। चलचित्रका सह निर्मातामा सन्दिप उप्रेती रहेका छन्। वर्ल्ड वाइड फिल्म्स डिस्ट्रिव्यूसन प्रा.लीको ब्यानरमा निर्माण भएको यो चलचित्रको रिलिज मिति तय गरिएको छैन। चलचित्र निर्माण पक्षका अनुसार रिलिज मिति छिट्टै घोषणा गरिने छ।
‘मिस्टर भर्जिन’ मा गौरव पहारी, विजय बराल, कमलमणि नेपाल, मरिश्का पोख्रेल, भोलाराज सापकोटा, रविन्द्र झा, सिर्जना सुब्बा लगायतका कलाकारको अभिनय छ। चलचित्रमा महेश दवाडीको कथा, रामेश्वर कार्कीको छायाङ्कन, विक्रम स्वाँर. दीपक याम सिंहको कोरियोग्राफी ,सुरज पण्डित, श्रीकृष्ण बम मल्ल, बुलेट फ्लो, आधा सुर, आर जे, मिस्टर प्रिन्सको सङ्गीत र मिलन डी. काप्रीले सम्पादन रहेको छ । चलचित्रमा टेक्निकल हेडको रूपमा दशरथ गिरी रहेका छन्।
