निर्देशक समाजको साधारणसभामा तनाव

ग्ल्यामर नेपाल, काठमाडौं । सदस्यता नविकरण गर्ने समय नदिई वार्षिक साधारण सभा गरेको भन्दै नेपाल चलचित्र निर्देशक समाजको शुक्रबारको वार्षिक साधारण सभामा असन्तुष्ट पक्षहरुले नाराबाजी गरेपछि समाजको साधारण सभामा अवरोध भएको छ । चाबहिलस्थित चलचित्र विकास बोर्डको सभाकक्षमा भएको १० औ साधारण सभामा केहि विपक्षी समूहले विरोध गरेपछि केहीबेर अवरोध भएको थियो । समाजका सल्लाहकारको उपस्थितिमा दुवै पक्षबीच वार्ता भएपछि बन्दसत्रबाट साधारणसभा सार्ने निर्णय गरिएको थियो ।

समाजमा २ सय ५० भन्दा बढी सदस्य भए पनि साधारणसभाका लागि ६४ जनाको मात्र नविकरण गरिएको थियो । समाजका महासचिव निलहरि काफ्लेले कार्यक्रम चलाईरहँदा एमएस अग्रज, ऋषि लामिछानेलगायतले स्टेजमै गएर साधारणसभा रोक्न माग गरेपछि माहौल तनावपूर्ण बनेको थियो । ‘आर्थिक वर्ष सकिनासाथ तुरुन्तै साधारणसभा राख्नु आफैमा हाँस्यास्पद छ,’केसीले भने,‘त्यसमाथि पनि समय नराखीकन एक्कासी नविकरणको कुरा आउनु आपत्तिजनक कुरा हो ।’
समाजका अर्का सदस्य डब्बु क्षेत्रीले समाजको सदस्यता सकिने मिति असार ३२ गतेसम्म भएको र साधारण सभा साउन २ गते बोलाइनु षडयन्त्रपूर्ण रहेको बताए । उनीहरुले कोरम नै नपुगी साधारण सभा गर्नु अमान्य हुने भन्दै सम्पूर्ण साधारण सदस्यहरुलाई नविकरण गर्न नदिएसम्म साधारण सभा गर्न नदिने अडान राखेका थिए ।  समाजका सल्लाहकारहरु लक्ष्मीनाथ शर्मा, उज्जवल घिमिरे, मोहन निरौलालगायतको मध्यस्थतामा दुवै पक्षबीच वार्ता भएपछि उद्घाटन सत्र सञ्चालन गर्न दिने र बन्दसत्रका लागि अर्को मिति तोक्ने निर्णय गरेपछि माहौल सामान्य बनेको थियो । कार्यक्रमका प्रमुख अतिथि बोर्डका अध्यक्ष धर्मेन्द्र मरवैता तनाव शुरु भएपछि कार्यक्रमबाट निस्किएका थिए । समाजका अध्यक्ष दिनेश डिसीले संस्था भित्र असन्तुष्ट बढ्नु आफैमा दुःखको कुरा रहेको जनाउँदै आफुहरुले मिलाएर लाने प्रयास गरेको बताए ।

अध्यक्ष डिसीको कार्यकालमा अपारदर्शी क्रियाकलाप गरेको र व्यक्तिगत फाइदाका लागि संस्थालाई प्रयोग गरेको भन्दै केहि महिना अगाडी कार्यसमितीका ६ जना पदाधिकारीहरुले समाजबाट राजिनामा दिएका थिए । समाजको कार्यक्रममा फिल्म ‘नाइ नभन्नु ल २’ का निर्देशक विकास आचार्यलाई ‘वर्षका लोकप्रिय निर्देशक सम्मान ०७१’बाट सम्मानित गरिएको थियो । स्वास्थ्य समस्याका कारण कार्यक्रममा उपस्थित नभएपछि फिल्मका कलाकार तथा निर्माण नियन्त्रक उत्तम केसीले सम्मानपत्र ग्रहण गरेका थिए ।