सौगातलाई साढे ३ लाखको छात्रवृत्ति

काठमाडौं । गिनिज बुक अफ वल्र्ड रेकर्डमा विश्वकै कान्छो निर्देशकका रुपमा नाम लेखाएका निर्देशक सौगात विष्टलाई उनी अध्ययनरत विद्यालयले कक्षा १० सम्म निशुल्क छात्रवृत्तिको घोषणा गरेको छ । डिल्लीबजारस्थित सूर्योदय आवासीय माध्यमिक विद्यालयमा कक्षा २ मा अध्ययनरत आठ वर्षे सौगातले ७ वर्ष ३ सय ४० दिनमा फिल्म ‘लभ यू बाबा’को निर्देशन गरेका थिए ।

विद्यालय सञ्चालन समितिको सोमबार बसेको बैठकले उनलाई कक्षा ३ देखि कक्षा १० सम्म तीन लाख ५० हजार रुपैंयाँको छात्रवृत्ति प्रदान गर्ने निर्णय गरेको विद्यालयका प्रिन्सिपल लक्ष्यबहादुर केसीले बताए । यसअघि फिल्मी खबर साप्ताहिले आयोजना गरेको एक कार्यक्रममा उनलाई वर्ष व्यक्तिका रुपमा सम्मान गरिएको थियो ।