इन्टरनेटमा अनमोलको हंगामा

बहुप्रतिक्षित चलचित्र ‘कृ’को ट्रेलरले युटुब र सामाजिक संजालमा हंगामा मच्चायो। नायक अनमोल केसीको बदलिएको गेटअपलाई दर्शकले औधी रुचाए। चलचित्रको ट्रेलर युटुबमा करिब एक साता नम्बर १ ट्रेन्डिङमा रहीरह्यो। ट्रेलर रिलिज गरेको करिब ३ सातापछि चलचित्र निर्माण पक्षले चलचित्रको गीत रिलिज गर्यो। चलचित्रका मुख्य नायक अनमोल केसीलाई यो क्लब गीतमा फिचरिङ गरिएको छ। ‘यति यति पानी गंगै रानी’ बोलको क्लब गीत अंग्रेजी नयाँ बर्ष २०१८ को अवसर पारेर रिलिज गरिएको हो। यतिबेला यो गीतले पनि युटुब र सामाजिक संजालमा हंगामा मच्चाईरहेको छ।

https://video.glamournepal.com/kri-nepali-movie-anmol-kc-aditi-budhathoki-anoop-bikram-shahi

अनमोलले यो गीतका लागि निकै मिहिनेत गरेको उनको नृत्य शैलीले पनि प्रष्ट पार्छ। काठमाण्डौको डेजा भू र राजु पेन्टरले निर्माण गरेको भव्य सेटमा खिचिएको गीतको भिडियो निर्माणमा निकै मिहिनेत गरिएको देखिन्छ। चकलेटी अनुहारका कारण चर्चामा रहेका अनमोलले आफ्नो एक्सन र अभिनय क्षमता चलचित्रको ट्रेलरमा देखाइसकेका छन्। अब, यो गीत संगै उनको नृत्य क्षमता पनि देखिएको छ।

नयाँ बर्षमा यो गीत डिस्को थेकमा घन्किने विश्वास निर्माण पक्षको छ। अल्मोडा राना उप्रेती र मिस्टर आरजेको स्वर रहेको गीतमा मिस्टर आर जे कै शब्द तथा संगीत सुन्न सकिन्छ। गीतको भिडियोलाई रेनशा वान्तवा राइले कोरियोग्राफी गरेकी हुन् भने पुरुषोत्तम प्रधानले खिचेका हुन्। सुवास इन्टरटेन्मेन्टको ब्यानरमा निर्माण भएको चलचित्रलाई द सुपर काजोल फिल्मस्ले प्रस्तुत गरेको हो। चलचित्रमा सुवास गिरी र भूवन केसीको लगानी छ। सुरेन्द्र पौडेलले यो चलचित्रको निर्देशन गरेका हुन्। ट्रेलरले सकारात्मक प्रतिक्रियाले हौसिएका सुरेन्द्र गीतबाट पनि आशावादी देखिएका छन्।

कमल गिरी कार्यकारी निर्माता रहेको चलचित्रका सह–निर्माता श्री पराजुली हुन्। चलचित्रमा अनमोल केसी, अदिती वुढाथोकी, अनुप विक्रम शाही, कामेश्वर चौरासिया, सरोज खनाल, लक्ष्मी गिरी, रुपा राना लगायतका कलाकारको मुख्य भूमिका छ। माघ २६ गतेबाट यो चलचित्र देशभरका हलमा रिलिज हुनेछ।