नेफ्टा छाडेर तीन चर्चित कलाकार एनसेलको कन्सर्टमा

 ग्ल्यामर नेपाल, काठमाडौं। पटक–पटक मिति सारेको कारण नेफ्टा अवार्ड आयोजकले तीन चर्चित कलाकारलाई गुमाएको छ। अभिनेता जीवन लुइँटेल, अभिनेत्रीद्वय सञ्चिता लुइँटेल र प्रियंका कार्की अवार्डमा छुट्ने भएका हुन्। उनीहरु अर्वाड छाडेर एनसेलको कन्सर्टमा सहभागी हुने पक्का भएको छ। अवार्ड हुने जनावरी ३१ तारिखमै मलेसियामा एनसेलको भव्य कन्सर्ट हुँदैछ।

अवार्डमा प्रस्तुति दिनको लागि नायिका प्रियंकाले केही समय डान्सको रिहर्सलसमेत गरेकी थिइन्। तर पहिले तोकिएको अवार्डको मिति स्थगित भएकोले कार्यक्रम जुधेको उनको भनाई छ। उनले जनावरी ३१ तारिखका लागि पहिले नै एनसेलसँग सम्झौता भएकोले आफू अवार्डमा सरिक हुन नसक्ने बताइन्। प्रियंकासहित जीवन र सञ्चिता तीन दिन एनसेल टुरमा व्यस्त हुनेछन्। सञ्जिता लामो समयपछि स्टेजमा प्रस्तुत हुँदैछिन्।

नेपाल प्राविधिक संघको आयोजनामा हुन लागेको छैटौं नेफ्टा अवार्डका लागि राजेश हमाल, करिष्मा मानन्धर, रेखा थापा, आर्यन सिग्देल, नम्रता श्रेष्ठ, गजीत विष्टसहित झन्डै एक सय कलाकार तथा प्राविधिक र पत्रकार मलेसिया उड्दैछन्। मलेसिया जानकै लागि निरुता हिजो मुम्बईबाट काठमाडौं आएकी छिन्। अवार्डमा वरिष्ठ कलाकार निर शाहलाई ‘अभिनय शिरोमणी’को उपाधी दिइँदैछ।