Singer Sunita Dulal Reveals Baby Bump with Husband Rajesh KC. | image: tiktok/sunitadulal
लोकप्रिय गायिका सुनिता दुलाल पहिलो सन्तानको प्रतीक्षामा छिन्। श्रीमान् राजेश केसीसँग तीज गीतमा नाचेको भिडियो सार्वजनिक गर्दै उनले पहिलोपटक बेबी बम्प देखाएकी हुन्।
सामाजिक सञ्जालमा सार्वजनिक भिडियोमा सुनिता र राजेशलाई तीज गीत ‘झुम्का लगाउँछु’ मा रमाउँदै नाचिरहेको देख्न सकिन्छ। भिडियोमा देखिएको बेबी बम्पसँगै गायिकाले आफ्नो जीवनको नयाँ खुसी प्रशंसकमाझ साझा गरेकी छन्।
सुनिताले गर्भावस्थाबारे लामो औपचारिक घोषणा भने गरेकी छैनन्। तर श्रीमान्सँगको उत्साहपूर्ण भिडियोले उनीहरू पहिलो सन्तानलाई स्वागत गर्ने तयारीमा रहेको खबर सार्वजनिक गरेको हो।
तीज गीतका कारण दर्शकमाझ विशेष पहिचान बनाएकी सुनिताले यही सांगीतिक माहोलबाट व्यक्तिगत जीवनको खुसी बाँड्नु प्रशंसकका लागि थप रोचक बनेको छ। भिडियो सार्वजनिक भएसँगै उनलाई शुभकामना दिने क्रम पनि सुरु भएको छ।
सुनिता र राजेशले २०८२ मंसिर १३ गते काठमाडौंको मूलपानीस्थित नर्लिङ रिसोर्टमा विवाह गरेका थिए। पारिवारिक सदस्य, आफन्त तथा निकट कलाकारको उपस्थितिमा उनीहरूको विवाह सम्पन्न भएको थियो।
विवाहअघि उनीहरूले इन्गेजमेन्टको तस्बिर सार्वजनिक गर्दै जीवनको नयाँ यात्रा सुरु गरेको बताएका थिए। त्यसबेला सुनिताले प्रेम, सम्मान र विश्वासका साथ अघि बढ्ने प्रतिबद्धता व्यक्त गरेकी थिइन्।
विवाहको केही महिनापछि पहिलो सन्तानको प्रतीक्षामा रहेको खबर सार्वजनिक भएसँगै सुनिताको व्यक्तिगत जीवन फेरि प्रशंसकमाझ चर्चामा आएको छ। उनले सम्भावित प्रसूति मिति वा गर्भावस्थासम्बन्धी थप विवरण भने खुलाएकी छैनन्।
