हलिउड फिल्म ‘एभरेष्ट’मा विजय लामा

 ग्ल्यामर नेपाल, काठमाडौं । समग्र नेपाली चलचित्र क्षेत्रको लागि एउटा खुशीको खबर। नेपाली कलाकार विजय लामाले हलिउड फिल्ममा अभिनय गर्ने मौका पाएका छन्। हाल नेपालमा सुटिङ भइरहेको चलचित्र ‘एभरेष्ट’मा विजयले महत्वपूर्ण भूमिका निर्वाह गर्ने अवसर पाएका हुन्। चलचित्रमा उनको छोटो र निकै चुनौतीपूर्ण भूमिका रहेको बताइएको छ।
 ‘एभरेष्ट’को निर्देशन बाल्टासार कोरमाकुरले गरिरहेका छन्। जसमा चर्चित हलिउडका कलाकारहरु जोश ब्रोलिन, ज्याक गिलेनहाह र जेसन क्लार्क मुख्य भूमिकामा छन्। यी कलाकारसँगै विजयले पनि अभिनयको मौका पाएका हुन्। उनी कर्णेल मदन केसीको भूमिकामा अभिनय गरेको बताइएको छ। यो चलचित्रको हाल हिमाली क्षेत्रमा छाँयाकन भइरहेको छ।
 सगरमाथामाथिको बेस्टसेलर बुक ‘इन टु थिन एयर’माथि चलचित्र निर्माण हुन लागेको हो। चलचित्रले सन् १९९६ मे १० मा सगरमाथा आरोहणका क्रममा आँधि आउँदा ज्यान गुमाएका आठ जनाको संघर्षको कथा भन्नेछ। चलचित्रको छायाँकन नेपालपछि आइसल्याण्ड र इटलीमा हुनेछ। चलचित्रमा अभिनेता गिलेनहालले अमेरिकी आरोहण दलका प्रमुख स्कट फिसरको भूमिका निर्वाह गर्ने जनाइएको छ। कोरमाकुरले यसअघि ‘टु गन्स’, ‘इनहेल’ र ‘दि डिप’ जस्ता फिल्म निर्देशन गरिसकेका छन्।