नेपाली फिल्ममा प्रदीप खड्का र सनिशा भट्टराई नयाँ जोडीका रूपमा देखिने भएका छन्। निर्देशक सुदर्शन थापाको नयाँ रोमान्टिक फिल्म ‘शुभ विवाह’को औपचारिक घोषणा गर्दै निर्माण पक्षले प्रदीप–सनिशासहित कलाकार तथा प्राविधिक टोली सार्वजनिक गरेको छ।
काठमाडौंमा आयोजित पत्रकार सम्मेलनमार्फत फिल्मसँगै नयाँ निर्माण कम्पनी प्रियादर्शन फिल्म्स पनि सार्वजनिक गरिएको छ। यही ब्यानरमा निर्माण हुने फिल्मकी निर्माता सुप्रिया कटुवाल हुन् भने साम भुजेल कार्यकारी निर्माताको जिम्मेवारीमा छन्।
यो फिल्मको अर्को विशेष पक्ष हो – प्रदीप खड्का र सुदर्शन थापाको करिब एक दशकपछिको पुनर्मिलन। सन् २०१६ मा प्रदर्शन भएको ‘प्रेम गीत’पछि उनीहरू फेरि प्रेमकथामा सहकार्य गर्न लागेका हुन्।
‘शुभ विवाह’ले प्रदीप र सुदर्शनलाई लामो अन्तरालपछि एउटै प्रोजेक्टमा जोडेको छ। सुदर्शनको निर्देशनमा बनेको ‘प्रेम गीत’ प्रदीपको करिअरका चर्चित फिल्ममध्ये एक बनेको थियो। अब उनीहरू फेरि रोमान्टिक कथामै फर्किएका छन्। यसपटक प्रदीपको जोडीका रूपमा सनिशा भट्टराई देखिनेछिन्।
फिल्मको औपचारिक घोषणाअघि नै सनिशाको नामलाई लिएर फिल्म वृत्तमा चर्चा चलेको थियो। निर्माण पक्षले कार्यक्रममा उनको सहभागिता औपचारिक रूपमा सार्वजनिक गरेको हो।
घोषणा कार्यक्रमलाई पनि फिल्मको शीर्षकअनुसार विवाहको माहोल दिने शैलीमा प्रस्तुत गरिएको थियो। केही सञ्चारमाध्यमका अनुसार कार्यक्रममा प्रदीप र सनिशाले इन्गेजमेन्ट शैलीमा औंठीसमेत साटेका थिए। तर यो वास्तविक इन्गेजमेन्ट नभई फिल्मको प्रचारात्मक प्रस्तुतिको हिस्सा थियो।
कार्यक्रमको छोटो भिडियो हेर्नुहोस्
फिल्ममा प्रदीप र सनिशासँगै हरिहर शर्मा, वसुन्धरा भुसाल, मुकुन्द किशोर भट्टराई, कृष्ण ढुङ्गाना, विशाल पहारी, अंशु महर्जन, बिन्दा खतिवडा, अनिता बस्नेत, मेक्सम गौडेल, सन्तोष थापा, सुनिशा बजगाईँ, आश्मा गिरी, रामेश्वर रिजाल, सुहान श्रेष्ठ र रमेश बज्राचार्यको अभिनय रहनेछ।
रोमान्टिक कथावस्तुमा बन्ने ‘शुभ विवाह’को कथा प्रदीप श्रीवास्तवले लेखेका हुन्। रामशरण पाठकले पटकथा तथा संवाद तयार पारेका छन्। फिल्ममा अर्जुन पोखरेलको संगीत र रेभन आरती सिंहको पार्श्वसंगीत रहनेछ।
राजेश श्रेष्ठले छायांकन गर्ने फिल्मको सम्पादन मिलन श्रेष्ठले गर्नेछन् भने कलर ग्रेडिङको जिम्मेवारी राजेन्द्र मोक्तानले सम्हाल्नेछन्। विक्रम स्वार नृत्य निर्देशक र साहिल खान ट्रेलर सम्पादकका रूपमा जोडिएका छन्।
वसन्त अधिकारी प्रमुख सहायक निर्देशक छन् भने साजन कट्टेल र प्रार्थना पाठक सह–निर्देशक हुन्। ध्वनिमा मनोज लामा, कला निर्देशनमा रोशन दिवाना र प्रोडक्सन म्यानेजरका रूपमा सुदीप ढकाल रहनेछन्।
फिल्मको पोसाक सुशीला केसी र आकृति पन्तले तयार पार्नेछन्। आनन्द महर्जनले पब्लिसिटी डिजाइन तथा पोस्टर, मनोज श्रेष्ठले कम्पनी लोगो एनिमेसन र अनन्त घिमिरेले टिजर एनिमेसनको जिम्मेवारी सम्हाल्नेछन्।
निर्माण पक्षले ‘शुभ विवाह’को छायांकन चाँडै सुरु गर्ने तयारी गरेको छ। फिल्मलाई फागुन २१, २०८३ अर्थात् मार्च ५, २०२७ देखि देशभर प्रदर्शन गर्ने घोषणा गरिएको छ।
यही मितिमा पूजा शर्मा र विजय बराल अभिनीत ‘रत्यौली’ पनि रिलिज हुने घोषणा भइसकेको छ। मुस्कान ढकालको निर्देशनमा बन्ने ‘रत्यौली’ले यसअघि नै फागुन २१ लाई प्रदर्शन मिति तय गरेको थियो।
दुवै निर्माण पक्षले रिलिज मिति यथावत् राखे आगामी फागुनमा नेपाली बक्स अफिसमा दुई चर्चित फिल्मबीच प्रतिस्पर्धा देखिनेछ।
प्रदीप–सनिशाको नयाँ जोडी, प्रदीप–सुदर्शनको दशकपछिको पुनर्मिलन र फिल्म घोषणामै अपनाइएको विवाह–थिमको प्रचार शैलीले ‘शुभ विवाह’ छायांकन सुरु हुनुअघि नै फिल्मको चर्चा बढेको छ।
