ग्ल्यामर नेपाल, काठमाडौं ।
हाल किन्डल रेड स्टुडियोमा पोष्टप्रोडक्सनमा रहेको फिल्म ‘तथास्तु’को गीति प्रोमो सार्वजनिक भएको छ । सविर श्रेष्ठको निर्माण तथा निर्देशनमा बनेको फिल्मको प्रोमोमा ‘कहिले माया स्याड डे’ गीतसँगै अभिनेत्री रेखा थापाको ‘तथास्तु’ भन्ने संवाद राखिएको छ । उनले हातमा पेस्तोल बोकेर तथास्तु भन्दै कसैलाई तेर्साएको देखाइएको छ । तर उनले कसलाई तेर्साईन् भन्ने चाहिँ केही खुलाइएको छैन । उनको निशानामा को परे भनेर बुझ्न चाहिँ पौष २५ गते नै पर्खनु पर्नेछ, किनकी फिल्म यही मितिमा रिलिज हुँदैछ ।
‘कसले चोर्यो मेरो मन’ र ‘काली’ जस्ता राम्रा व्यावसायिक सफल फिल्म निर्देशन गरेका चर्चित निर्देशक सविरले यो फिल्म निर्माणमा रामहरि धितालको पनि साथ लिएका छन् । फिल्ममा किशोर खतिवडा, सुवास थापा र विज्ञान जोशी छन् ।
फिल्मको पटकथा एवं संवाद जगदिश्वर थापाको हो । बाबु श्रेष्ठको छायाँकन रहेको फिल्ममा बसन्त सापकोटाको संगीत तथा राजमी लामिछाने र कविराज गहतराजको नृत्य निर्देशन छ । द्धन्द्ध निर्देशन रोशन श्रेष्ठले गरेका छन् । निर्देशक सविरका अनुसार फिल्म नारी प्रधान एक्सन फ्लेबरको छ ।
