एक्सनमा शिव श्रेष्ठ खलनायक

काठमाडौं । फिल्म निर्माणमा नयाँ अनुहारको आकर्षण बढिरहेको छ । यसै क्रममा नव निर्माताहरुको समूहले एक्सन नायक शिव श्रेष्ठलाई नेगेटिभ हिरोका रुपमा प्रस्तुत गर्दै नयाँ फिल्म ‘एक्सन’ निर्माण गरेको छ ।
चिरायु फिल्म्स्को व्यानरमा दीपेन्द्र कोइराला र शर्मिला गुरुङद्वारा निर्माण गरिएको फिल्ममा अभिनेता शिवलाई लामो समयपछि नेगेटिभ हिरोका रुपमा दर्शकले देख्न पाउनेछन् । शिव पुराना फिल्ममा एक्सन हिरोका रुपमा चर्चित अभिनेता हुन् ।

राजु अर्यालको निर्देशन र लेखनमा निर्माण भईरहेको फिल्मले देशको बिग्रदो राजनैतिक अवस्था र बढ्दो भ्रष्टाचारको कथालाई प्रस्तुत गरेको छ । फिल्ममा शिवले एउटा भ्रष्टाचारी मन्त्रीको भूमिकामा अभिनय गरेका छन् ।

शिवबाहेक दिपेन्द्र कोइराला, प्रमोद दीप, जेनिषा केसी, रक्षा गुरागाईं, राज थपलिया, कसम गुरुङ, दिनेश घिमिरेलगायतको पनि अभिनय रहेको छ ।

९० प्रतिशत छायांकन कार्य पूरा भईसकेको फिल्ममा राजु अर्यालको गीत, प्रल्हाद बोगटीको संगीत, गोविन्द प्रभातको नृत्य, कुमार महर्जनको द्वन्द्व र रविन्द्र बरालको छायांकन रहेको छ ।