कस्तो होला आर्यनको रिसाहा रुप ? (भिडियो)

ग्ल्यामर नेपाल, काठमाडौं । फिल्म निर्माता तथा अभिनेता आर्यन सिग्देल नेपाली फिल्म क्षेत्रमा चकलेटी र लभर ब्वाईका रुपमा चिनिन्छन्। उनलाई फिल्ममा रिसाहा र ग्याङस्टारको भूमिकामा आम दर्शकले अहिलेसम्म फिल्मको पर्दामा हेर्न पाएका छैनन्। तर अब भने यिनै नायकलाई दक्षिण भारतीय फिल्मको शैलीका हिरो झैं रिसाहा चरित्रमा पर्दामा देख्न पाइने भएको छ।

आगामी भदौ १३ गतेबाट अल नेपाल रिलिज हुन लागेको फिल्म ‘नाइके’मा आर्यनलाई रिसाहा नाइकेको भूमिकामा देखिन लागिएको हो। ‘अहिलेसम्म मैले अभिनय गरेका फिल्ममा मेरो क्यारेक्टर एकै किसिमको थियो, त्यसकारण पनि आफुलाई एक्सन शैलीको अलिक भिन्न भूमिकामा पर्दामा देखिन मन थियो,’फिल्मबारे जानकारी दिन राजधानीमा शुक्रबार आयोजित पत्रकार सम्मेलनमा आर्यनले भने, ‘दर्शकको चाहना पनि आर्यन अलिक फरक भूमिकामा देखियोस् भन्ने थियो, त्यो चाहनालाई नाइकेमा मैले पुरा गरेको छु।’

ब्ल्याक स्याडो प्रोडक्सशनको ब्यानरमा निर्मित फिल्मका लेखक तथा निर्देशक नेत्र गुरुङले बनिरहेका अन्य फिल्म भन्दा आफुले नाइकेमा केही नयाँपन ल्याएको दाबी गरे। कार्यक्रममा फिल्मको प्रोमो र एक गीत सार्वजनिक गरिएको थियो। विष्णु हमाल, जगदिश खनाल, नारायण खनाल, आनन्द क्षेत्री र संगीता पराजुली निर्माता रहेको फिल्ममा आर्यनबाहेक रेम बिक, सुरबिना कार्की, बोधराज रेग्मी, सारिका केसी, विजयराज सेन्चुरीलगायतको अभिनय रहेको छ । रोहन नेपालीको कोरियोग्राफी, सानुकुमार महर्जनको द्वन्द्व, ताराप्रकाश लिम्बु, योगेश काजी बिसी र रमण गायकको संगीत रहेको फिल्ममा अर्जुन तिवारीको छायांकन रहेको छ।

CLICK HERE TO VIEW ARYAN SIGDEL AND SURBINA KARKI PHOTO GALLERY