नेपाली चलचित्र ‘महादशा’ले आफ्ना मुख्य कलाकारको रुपमा अभिनेता उत्तम प्रधान र नायिका निरुता सिंहलाई अनुबन्ध गरेको छ। सन् २००३ मा प्रदर्शन भएको चलचित्र ‘उपहार’ पछि यो जोडीले चलचित्र ‘महादशा’ मार्फत पुनरागमन गर्न लागेको हो। उत्तम प्रधान र निरुता सिंहजस्ता स्थापित कलाकारको सहभागिताले चलचित्र उद्योगमा निकै सकारात्मक प्रभाव पारेको छ।
किरण नेपालीको निर्देशनमा तयार हुने यस चलचित्रमा समाजका विविध पक्ष र जीवनका चुनौतीपूर्ण परिस्थितिलाई प्रस्तुत गरिने बताइएको छ। कलाकारको घोषणासँगै चलचित्रले दर्शकमाझ थप उत्सुकता जगाएको छ। लेकाली इन्टरटेन्मेन्टले निर्माण गर्ने फिल्ममा प्रमोद अग्रहरी, प्रेमा लामगाढे र हाकिम गुरुङको अभिनय रहनेछ।
मनिष गौतमले लेखेको फिल्ममा राजेन्द्र के शाह, श्याम मगर र अमला देवी राईले लगानी गरेका छन्। सुरज आचार्य कार्यकारी निर्माता रहेका छन्।
