ग्ल्यामर नेपाल, काठमाडौं ।
नयाँ पुस्तामा धेरै फ्यान फलोअर भएका हिरो हुन्, अनमोल केसी। यो लोकप्रियता उनले अभिनेता भुवन केसीको छोरा भएर मात्र पाएका भने होइनन्। फिल्म ‘होस्टेल’मा उनको अभिनय र क्युट लुक्स देखेपछि तन्नेरी पुस्ता उनीप्रति लोभिएको हो। उनको अदाको तारिफ नगर्ने सायदै कोही होला। सोही कारण पहिलो फिल्मबाटै चर्चाको शिखरमा पुग्न सफल भए तर ‘होस्टेल’ रिलिज भएको दुई वर्ष बित्न लाग्दा पनि अनमोलको अर्को फिल्म नआएपछि उनी विस्तारै ओझेलमा पर्दै गएको आभाष भएको थियो। जुन स्वभाविक पनि हो।
तर अब फेरि उनको चर्चा र लोक प्रियताले पिकअप लिन थालेको छ। कारण हो, उनको नयाँ फिल्म रिलिज ‘जेरी’। ‘होस्टेल’कै निर्देशक हेमराज बिसीद्वारा निर्देशित यो फिल्म २८ कात्तिकमा रिलिज हुँदैछ। प्रोमोले चर्चा पाएपछि अनमोल निकै उत्साही बनेका छन्। अनमोलको क्रेजकै कारण फिल्म युनिटले उनलाई नै प्रमोशनमा पहिलो स्थानमा राखेको छ। अब हेर्नुछ, उनले दर्शक र फिल्म युनिटको अपेक्षा कतिको पुरा गर्नेछन् ?
