ग्ल्यामर नेपाल, काठमाडौं ।
फिल्म ‘सरी ल’ बाट नेपाली रजतपटमा डेब्यु गरेकी नायिका अनिता आचार्य अभिनित अर्को फिल्म ‘अलबिदा’को प्रदर्शनको तयारीमा छ । पौष २५ गतेबाट अल नेपाल रिलिज हुने फिल्ममा उनले मुस्लिम युवतीको भूमिका निभाएकी छन् ।
अनिताले हालैको भेटमा फिल्मको अनुभव सुनाएकी थिईन् । उनले फिल्ममा अभिनेता आर्यन सिग्देलसँग काम गर्न निकै सजिलो भएको बताईन्, जबकि अघिल्लो फिल्ममा अभिनेता सुवास थापासँग त्यति सहज महशुस गरेकी थिईनन् रे । ‘आर्यनजी एकदमै सहयोगी भावनाको लाग्यो, अभिनयको तरिका सिकाउनु हुन्थ्यो, हरेक कुराको ख्याल गर्नुहुन्थ्यो,’अनिताले भनिन्,‘सुवासजीमा चाहिँ आर्यनजीको जस्तो गुण देखिन्, उहाँ अलिक घमण्डी किसिमको लाग्यो ।’
अनिताले फिल्ममा मुस्लिम भूमिकामा अभिनय गर्दा कुनै अप्ठ्यारो नलागेको जनाईन् । ‘यो फिल्म खेल्नु अघि मैले मस्जिदमा गएर विविध विषयमा जानकारी लिएको थिएँ,’अनिताले भनिन्,‘जसले गर्दा पनि फिल्ममा काम गर्दा सहज भयो।’ फिल्ममा उनले अभिनेता आर्यन र अर्का अभिनेता तथा निर्माता हसनराजा खानसँग रोमान्स गरेकी छन् । फिल्मका निर्देशक लक्ष्मण रिजालका अनुसार फिल्म अनिताको पात्र वरीपरी घुमेको छ ।
फिल्ममा नागेन्द्र रिजाल, मोहन निरौला, पंकजराज जोशी, सुरेश न्यौपाने र शर्मिला खड्काको पनि अभिनय रहेको छ । केशव घिमिरे कार्यकारी निर्माता रहेको फिल्ममा हसनको कथा, लक्ष्मण र विशाल सापकोटाको पटकथा, विपिन मल्लको सम्पादन, रामजी लामिछानेको कोरियोग्राफी र रामेश्वर कार्कीको छायांकन रहेको छ ।
