काठमाडौं । स्काउट भन्ने बित्तिकै मानिसले इमान्दारिता र असल कामको सारथी सम्झन्छन् । अब यही कुरालाई दर्शकले पर्दामा हेर्न पाउने भएका छन् । ‘बजार’, ‘विन्दास’ र ‘विन्दास २’ का निर्माता मधुकुमार श्रेष्ठले यसै विषयलाई उठान गर्दै ‘स्काउट–द ब्रेभ’ बनाउन लागेका हुन् ।
फिल्मको शुक्रबार राजधानीमा आयोजित एक कार्यक्रममा फिल्मको मुहुर्त गरिएको छ । गोविन्द गौतमको लेखन र निर्देशन रहने फिल्ममा गरिमा पन्त र कुशल थापाले रोमान्स गर्नेछन् । केदार पराजुली र ईश्वर तिवारीको लगानी रहने फिल्ममा नवराज श्रेष्ठ, मधुकुमार श्रेष्ठ, सुनिल अधिकारी, राजन सेढाई, सुधा रावल, खुशी वाग्ले, स्वेच्छा शाहलगायतका कलाकारको अभिनय रहनेछ । बसन्त सापकोटा र विकास चौधरीको संगीत रहने फिल्ममा रोशन श्रेष्ठको द्वन्द्व र गणेशकुमार श्रेष्ठको छायांकन हुनेछ ।
चाँडै नै फ्लोरमा जाने फिल्मलाई नेपाल चलचित्र निर्माता संघका अध्यक्ष राजकुमार राई, एफडी कम्पनीका अध्यक्ष प्रदीपकुमार उदय, सभासद राजेन्द्र केसी, सूचना तथा सञ्चारमन्त्री डा. मिनेन्द्र रिजाललगायतले शुभकामना दिएका थिए ।
