सुन्दरी नायिकाहरुले सार्वजनिक गरे 'अधकट्टी' अडियो

काठमाडौं । सञ्चारकर्मी सुव्रत आचार्यको डेब्यु निर्देशन रहेको फिल्म ‘अधकट्टी’ को अडियो राजधानीमा सोमबार साँझ नेपाली फिल्म क्षेत्रका नौं सुन्दरी नायिकाले सार्वजनिक गरेका छन् । पुराना पुस्ताकी अभिनेत्री करिश्मा मानन्धर देखि पछिल्ला पुस्ताका झरना थापा, दिपाश्री निरौला, हर्षिका श्रेष्ठ, नम्रता श्रेष्ठ, निता ढुंगाना, ऋचा शर्मा, प्रियंका कार्की र शिल्पा पोखरेलले अडियो सार्वजनिक गरे ।
आउँदो जेठ ९ गते देखि अल नेपाल प्रदर्शनमा आउने फिल्म ‘अधकट्टी’ मा पाँच गीत समावेश छन् जहाँ बसन्त सापकोटा (अतिथि) र राजन इशानले संगीत दिएका छन् । कार्यक्रमलाई सांगीतिक बनाउन फिल्मका कलाकारहरु गौरव पहारी, रिस्ता बस्नेत, अशिष्मा नकर्मी, प्रदीप बास्तोला, नम्रता श्रेष्ठ र विल्सन विक्रम राईले फिल्मका गीतमा नाँचेका थिए । फिल्मका प्रस्तुतकर्ता प्रदीपकुमार उदयले फिल्मका गीतहरु श्रोतामाझ हिट भईसकेको बताईरहँदा निर्देशक आचार्यले फिल्म सुपरहिट बन्नेमा विश्वास व्यक्त गरे ।
सञ्चारकर्मी सुवास ढकालको कथा, निर्देशक आचार्य र सञ्चारकर्मी विजय अधिकारी तथा जया शर्माको पटकथा र संवाद रहेको फिल्ममा रोशन श्रेष्ठको द्वन्द्व, राजन इशान र बसन्त सापकोटाको संगीत, कविराज गहतराज र गम्भिर विष्टको नृत्य छ । फिल्मको अफिसियल अनलाइन मिडिया पार्टनरका रुपमा ग्ल्यामर नेपाल रहेको छ ।