ग्रामीण कथा र मौलिक नेपाली सिनेमालाई केन्द्रमा राख्दै आयोजना हुँदै आएको पाँचौँ नेपाल ग्रामीण चलचित्र महोत्सव ‘NERUFF’ को प्री–इभेन्ट राजधानी काठमाडौंमा सम्पन्न भएको छ।
काठमाडौंस्थित Film Development Board Nepal को सभाहलमा आयोजित कार्यक्रममा महोत्सवको तयारीबारे जानकारी दिँदै अफिसियल सेलेक्सनमा परेका १७ वटा चलचित्रलाई प्रमाणपत्र प्रदान गरिएको थियो।
यो महोत्सव आगामी वैशाख १५ देखि १७ गतेसम्म सर्लाहीको चन्द्रनगर गाउँपालिकामा सञ्चालन हुनेछ। विशेष कुरा के छ भने, यसपटक महोत्सव पहिलोपटक तराई क्षेत्रमा आयोजना हुन लागेको हो, जसले यसको पहुँचलाई अझ फराकिलो बनाउने अपेक्षा गरिएको छ।
कार्यक्रममा Janakdeep Parajuli, Sameer Balami लगायत फिल्म क्षेत्रका विभिन्न व्यक्तित्वहरूको उपस्थिति रहेको थियो।
महोत्सवका अध्यक्ष Raghunath Sapkota ले सम्पूर्ण तयारी पूरा भइसकेको जानकारी दिँदै महोत्सवको मुख्य उद्देश्य ग्रामीण क्षेत्रसम्म नेपाली सिनेमा पुर्याउनु रहेको बताए। “हिमाल, पहाड, तराई, कोही छैन पराई” भन्ने मूल नारासहित यसअघि गोरखा, काभ्रे, रामेछाप र रसुवामा आयोजना भइसकेको महोत्सव अब मधेश क्षेत्रमा विस्तार हुँदैछ।
Sapkotaका अनुसार ग्रामीण कथा, मधेशी संस्कृति र स्थानीय जीवनशैलीलाई प्रवर्द्धन गर्ने लक्ष्यसहित सर्लाहीलाई छनोट गरिएको हो।
यस वर्ष महोत्सवका लागि ५० भन्दा बढी फिचर, सर्ट र विभिन्न भाषाभाषी चलचित्रहरूले आवेदन दिएका थिए। तीमध्येबाट १७ उत्कृष्ट फिल्म छनोट गरिएका छन्, जुन दर्शकले महोत्सव अवधिभर निःशुल्क हेर्न पाउनेछन्।
फिचर फिल्मतर्फ ‘सिटामोल’, ‘कोशेढुंगा’, ‘माइतीघर’, ‘मोहर’ र ‘गुन्युचोलो’ चयनमा परेका छन्। कार्यक्रममा ती फिल्मका निर्माण टिमहरूले प्रमाणपत्र ग्रहण गरेका थिए।
महोत्सवले नेपाली मौलिक फिल्मप्रति दर्शकको आकर्षण बढाउने, नियमित रूपमा सिनेमा हेर्ने संस्कार विकास गर्ने र स्थानीय भाषा, कला, संस्कृति तथा पर्यटनलाई अन्तर्राष्ट्रिय स्तरसम्म प्रवर्द्धन गर्ने लक्ष्य लिएको छ।
पाँचौँ संस्करणसम्म आइपुग्दा ‘NERUFF’ ले आफ्नो छुट्टै पहिचान बनाइसकेको दाबी आयोजकहरूको छ।
महोत्सव सफल बनाउन Film Development Board Nepal र चन्द्रनगर गाउँपालिकाबीच सहकार्य रहेको छ, जसले कार्यक्रमलाई अझ प्रभावकारी बनाउने अपेक्षा गरिएको छ।
यो पनि पढ्नुहोस्:
विवादमा ‘लालीबजार’: प्रदर्शन रोक्न माग गर्दै मुद्दा दायर
