Madan Krishna Shrestha and Devika Bandana’s new duet “Timisanga Bihe Bho”, featuring Deepa Shree Niraula and Dinesh DC in a humorous wedding-themed story.
वरिष्ठ कलाकार मदनकृष्ण श्रेष्ठ र चर्चित गायिका देविका बन्दनाको स्वर रहेको नयाँ युगल गीत ‘तिमीसँग बिहे भो’ सार्वजनिक भएको छ। गीतको म्युजिक भिडियो काठमाडौंस्थित जय नेपाल सिनेमा हलमा आयोजित विशेष कार्यक्रममा प्रिमियर गरिएको हो।
हास्यरस र कल्पनाशील कथावस्तुमा आधारित भिडियोमा विवाहित जोडीको रमाइलो सपना र कल्पनालाई प्रस्तुत गरिएको छ। कथामा मदनकृष्ण श्रेष्ठले दीपा श्री निरौलासँग बिहे गरेको सपना देख्छन् भने दीपा श्री निरौलाले दिनेश डीसीसँग बिहे गरेको कल्पना गर्छिन्। यही रमाइला सपना दृश्यले भिडियोको मुख्य आकर्षण थपेको छ।
Deepa Shree Niraula and Dinesh DC in a humorous wedding-themed story: Timi Sanga Bihe Bho
गीतमा मदनकृष्ण श्रेष्ठ र देविका बन्दनाको स्वर छ भने शब्द मदनकृष्ण श्रेष्ठले नै लेखेका हुन्। कार्यक्रममा गायिका देविका बन्दनाले वरिष्ठ कलाकार मदनकृष्ण श्रेष्ठसँग युगल गीत गाउने आफ्नो लामो समयदेखिको चाहना पूरा भएको बताइन्। उनले गीतको फरक सोच र रमाइलो प्रस्तुतिलाई दर्शक तथा श्रोताले माया गर्ने विश्वास व्यक्त गरिन्।
कार्यक्रममा मदनकृष्ण श्रेष्ठले म्युजिक भिडियो छायांकनका केही रमाइला अनुभव पनि सुनाए। भिडियोमा बेहुलाको भूमिकामा देखिँदा र परम्परागत विवाह पहिरन लगाउँदा आफूलाई केही लाज लागेको उनले हाँस्दै सुनाए।
भिडियोमा मदनकृष्ण श्रेष्ठकी श्रीमतीको भूमिकामा देखिएकी अभिनेत्री दीपा श्री निरौलाले पनि उनीसँग काम गर्न पाउँदा खुसी व्यक्त गरिन्। मदनकृष्ण श्रेष्ठसँग काम गर्ने आफ्नो चाहना पूरा भएको भन्दै उनले निर्देशक केशव राज भट्ट र गायिका देविका बन्दनाप्रति आभार व्यक्त गरिन्।
Madan Krishna Shrestha and Deepa Shree Niraula, the music video brings humor, wedding fantasy, and musical charm together.
देविका बन्दनाको आधिकारिक युट्युब च्यानलमार्फत सार्वजनिक गरिएको गीतमा अनिल शाहीको संगीत तथा संगीत संयोजन छ। गीत ब्लुबेरी स्टुडियोमा रेकर्ड गरिएको हो भने मिक्सिङ र मास्टरिङ दीप तुलाधरले गरेका छन्।
म्युजिक भिडियोको निर्देशन केशव राज भट्टले गरेका हुन्। भिडियोमा मदनकृष्ण श्रेष्ठ, दीपा श्री निरौला र दिनेश डीसी मुख्य भूमिकामा देखिएका छन्। छायांकन हरि हुमागाईंले गरेका छन् भने सम्पादन, कलर ग्रेडिङ र ग्राफिक डिजाइन मनोज कार्कीले सम्हालेका छन्।
कलाकारहरूको पहिरन चर्चित फेसन डिजाइनर काजल शर्माले तयार गरेकी हुन् भने मेकअप विश्वराम केसीले गरेका छन्। सहायक क्यामेराम्यानका रूपमा युवराज हुमागाईं छन्। लाइटिङ व्यवस्थापन सुरेश थापा, राम प्रसाद हुमागाईं, राजेन्द्र हुमागाईं र गोकुल हुमागाईंले गरेका छन्।
संगीत, हास्य र सिर्जनात्मक प्रस्तुतिको संयोजनले ‘तिमीसँग बिहे भो’लाई दर्शकका लागि मनोरञ्जनात्मक म्युजिक भिडियो बनाएको छ।
