वरिष्ठ कलाकार मदनकृष्ण श्रेष्ठको जीवनमा आधारित बायोपिक चलचित्र ‘म मदनकृष्ण’मा हरिवंश आचार्यको भूमिका कसले निर्वाह गर्ला भन्ने कौतुहल अन्ततः मेटिएको छ। निर्माण पक्षले उक्त भूमिकाका लागि अभिनेता अरुण क्षेत्रीलाई अनुबन्ध गरेको छ।
वास्तविक जीवनमा दशकौँसम्म मदनकृष्ण श्रेष्ठको कलाकारिता यात्राका अभिन्न सहयात्री बनेका हरिवंश अब पर्दामा अरुणमार्फत प्रस्तुत हुनेछन्। हाल चलचित्र ‘गौँथली’बाट चर्चा पाइरहेका अरुणका लागि यो भूमिका अभिनय करिअरकै महत्त्वपूर्ण चुनौती मानिएको छ।
निर्देशक मिलन चाम्सका अनुसार अरुणलाई ‘म मदनकृष्ण’का लागि मात्र नभई भविष्यमा निर्माण गरिने हरिवंश आचार्यको बायोपिकका लागि पनि एकैपटक अनुबन्ध गरिएको हो।
“हामीले ‘म मदनकृष्ण’मा हरिवंश दाइको भूमिकाका लागि अरुणलाई लिएका छौँ। यससँगै हरिवंश दाइको जीवनकथामा बन्ने बायोपिकमा पनि उहाँकै भूमिका निर्वाह गर्न अरुणलाई अनुबन्ध गरेका छौँ,” चाम्सले भनेका छन्।
उनले सशक्त अभिनय गर्न सक्ने कलाकार खोज्ने क्रममा अरुणसम्म पुगेको उल्लेख गर्दै दर्शकले उनलाई हरिवंशको भूमिकामा मन पराउने विश्वास व्यक्त गरेका छन्।
पर्दामा मह जोडीको कथा
नेपाली हास्यव्यंग्य र मनोरञ्जन क्षेत्रमा ‘मह जोडी’का रूपमा स्थापित मदनकृष्ण श्रेष्ठ र हरिवंश आचार्यको सहकार्य चलचित्रको महत्त्वपूर्ण हिस्सा हुनेछ। त्यसैले महेश त्रिपाठी र अरुण क्षेत्रीले पर्दामा निर्माण गर्ने सम्बन्ध चलचित्रको सबैभन्दा प्रतीक्षित पक्षमध्ये एक बनेको छ।
चलचित्रमा मदनकृष्ण श्रेष्ठको भूमिका अभिनेता महेश त्रिपाठीले निर्वाह गर्नेछन्। केकी अधिकारी मदनकृष्णकी पत्नी यशोदाको भूमिकामा देखिनेछिन्।
मदनकृष्णको बाल्यकाल, सरकारी सेवाको अनुभव, कलाकारिता यात्रा, हरिवंशसँगको सहकार्य, अन्तरजातीय विवाह तथा व्यक्तिगत र व्यावसायिक जीवनका सुख–दुःखलाई चलचित्रमा समेटिने निर्माण पक्षले जनाएको छ।
कलाकारको बलियो समूह
चलचित्रमा राजाराम पौडेल, किरण केसी, रुषा न्यौपाने, यमन श्रेष्ठ र देशभक्त खनालको पनि अभिनय रहनेछ।
भिन्टेज मोसन पिक्चर्सको प्रस्तुतिमा बन्ने चलचित्रलाई राजकुमार श्रेष्ठले निर्माण गर्नेछन्। बायोपिक निर्देशनमा अनुभव बटुलेका मिलन चाम्सले यसअघि दृष्टिविहीन सृष्टि केसीको जीवनमा आधारित ‘ब्लाइन्ड रक्स’ र नेपाली राष्ट्रिय महिला फुटबल टोलीकी गोलरक्षक अञ्जिला तुम्बापो सुब्बाको जीवनमा आधारित ‘अञ्जिला’ निर्देशन गरेका थिए।
डिजिटल अधिकार ओएसआरलाई
‘म मदनकृष्ण’को डिजिटल अधिकार ओएसआर डिजिटलले खरिद गरिसकेको छ। निर्माण पक्षले उक्त सम्झौतालाई अहिलेसम्मकै महँगो डिजिटल अधिकार बिक्री भएको दाबी गरे पनि कारोबार रकम सार्वजनिक गरिएको छैन।
चलचित्रको छायांकन भदौको दोस्रो साताबाट सुरु गर्ने तयारी छ। रिच इन्टरटेनमेन्ट, एप्पल इन्टरटेनमेन्ट र एफडी कम्पनीले चलचित्र वितरण गर्ने बताइएको छ।
मदनकृष्ण श्रेष्ठ र हरिवंश आचार्यजस्ता नेपाली मनोरञ्जन क्षेत्रका दुई विशिष्ट व्यक्तित्वको सम्बन्धलाई नयाँ पुस्ताका अभिनेताले पर्दामा कसरी जीवन्त बनाउँछन् भन्ने विषयले ‘म मदनकृष्ण’प्रति दर्शकको उत्सुकता थप बढाएको छ।
