चलचित्र ‘पेन्सन पट्टा’को ट्रेलर सार्वजनिक भएपछि यसको विषयवस्तुले भारतीय राजदूतावासस्थित मिलिटरी पेन्सन शाखाको ध्यान खिच्यो। ट्रेलर हेरेपछि चलचित्रले उठाएको विषयप्रति चासो व्यक्त गर्दै शाखाले निर्माण टोलीलाई भेटघाटका लागि बोलाएको निर्माण पक्षले जनाएको छ।
चलचित्रको शीर्षक र कथासँग प्रत्यक्ष सम्बन्ध राख्ने ‘पेन्सन पट्टा’ वास्तविक रूपमा जारी हुने कार्यालयबाटै निम्तो आएपछि निर्माण टोली उक्त शाखामा पुगेको हो। नेपालमा रहेका भारतीय भूतपूर्व सैनिक तथा उनीहरूका परिवारलाई पेन्सन वितरण गर्ने, पेन्सन पट्टा जारी गर्ने तथा त्यसमा भएका त्रुटि सच्याउने काम यही शाखाबाट हुँदै आएको छ।
निर्माण पक्षका अनुसार ट्रेलर सार्वजनिक भएपछि मिलिटरी पेन्सन शाखाका कर्मचारीहरूले चलचित्रको विषयवस्तुप्रति चासो देखाएका थिए। त्यसपछि निर्माण टोलीलाई प्रत्यक्ष भेटघाट तथा अन्तरक्रियाका लागि निम्तो दिइएको थियो।
तर नेपालमा आएको विनाशकारी बाढीका कारण निर्माण पक्षले चलचित्रसम्बन्धी भेटघाट तथा प्रचार–प्रसारका कार्यक्रम तत्काल रोकेपछि उक्त भेट केही समय ढिला भएको बताइएको छ।
अन्ततः निर्माण टोली भारतीय दूतावासस्थित मिलिटरी पेन्सन शाखामा पुगेर त्यहाँका कर्मचारीसँग अन्तरक्रिया गरेको थियो। भेटका क्रममा कर्मचारीहरूले चलचित्र निर्माण भएकोमा बधाई दिँदै सफलताको शुभकामना पनि दिएका थिए।
निर्देशक तथा अभिनेता गुरुङले भेटका क्रममा भारतीय दूतावासका कर्मचारीबाट पाएको आत्मीयताको प्रशंसा गरे। ‘मीठो नेपाली भाषा बोल्ने मेजर राहुल झा तथा भारतीय दूतावाससम्बद्ध कर्मचारीज्यूहरूले देखाउनुभएको आत्मीयताप्रति हार्दिक आभार,’ गुरुङले भने।
चलचित्र ‘पेन्सन पट्टा’को ट्रेलर यहाँ हेर्नुहोस्।
भेटघाटका क्रममा आफूले पेन्सनसम्बन्धी केही नयाँ जानकारीसमेत पाएको गुरुङले बताए। उनका अनुसार नेपालमा भारतीय सेना तथा असैनिक (सिभिल) सेवाका गरी १ लाख १९ हजार ५ सय ४ जना पेन्सनभोगी रहेका छन्।
भारत सरकारले नेपालमा रहेका ती पेन्सनभोगीका लागि वार्षिक करिब ७ हजार १ सय करोड नेपाली रुपैयाँ पेन्सनबापत पठाउने गरेको जानकारी आफूले पाएको उनले बताए। ‘मलाई थाहै थिएन। आज थाहा भयो,’ गुरुङले भने।
मिलिटरी पेन्सन शाखामा भएको अन्तरक्रियाले चलचित्र निर्माणका क्रममा आफूहरूले बुझेको विषयभन्दा वास्तविकता अझ फराकिलो रहेको महसुस गराएको उनले संकेत गरे। ‘वर्षौंदेखि यही काम गर्नेहरूसँग बसेपछि थाहा हुन्छ, हामीले देखेको त सानो हिस्सा रहेछ,’ उनले भने, ‘बाँकी अहिले भन्दिनँ।’ यद्यपि, शाखाका कर्मचारीसँगको कुराकानीबाट चलचित्रको कथासँग सम्बन्धित के–कस्ता नयाँ कुरा थाहा पाए भन्नेबारे गुरुङले खुलाउन चाहेनन्।
यही गोप्यताले चलचित्रको कथाप्रति थप कौतूहल पनि सिर्जना गरेको छ। आखिर फिल्मको कथामा पेन्सन पट्टा कसरी जोडिन्छ? त्यसमा कसको नाम आउँछ? अनि एउटा पेन्सन पट्टाले परिवारभित्र कस्तो परिस्थिति सिर्जना गर्छ? निर्माण पक्षले यी प्रश्नको जवाफ अहिलेसम्म खुलाएको छैन। ‘त्यो हलमै हेर्नुहोला,’ गुरुङले मुस्कुराउँदै भने।
यसरी ट्रेलरबाट सुरु भएको चासो वास्तविक पेन्सन पट्टा जारी हुने कार्यालयसम्म पुगेको छ। एकातिर मिलिटरी पेन्सन शाखाले चलचित्रको विषयमा चासो देखाएर निर्माण टोलीलाई बोलाएको छ भने अर्कोतिर उक्त भेटपछि निर्माण पक्षले कथासँग जोडिएको रहस्य अझै खुलाएको छैन।
लामो समयको मेहनतपछि तयार भएको चलचित्र ‘पेन्सन पट्टा’ अब प्रदर्शनको तयारीमा छ। चलचित्र भदौ २६ गतेदेखि देशभरका सिनेमा हलमा प्रदर्शन हुँदैछ।
चलचित्र प्रदर्शनमा आएपछि अहिले उठेका दुई मुख्य प्रश्नको जवाफ पनि दर्शकले पाउनेछन्। मिलिटरी पेन्सन शाखाले ‘पेन्सन पट्टा’को ट्रेलरमा के देखेर निर्माण टोलीलाई बोलायो, र पर्दाभित्र लुकेको ‘पेन्सन पट्टा’को वास्तविक कथा आखिर के हो?
