
Organizers say more than 500 films have been submitted for the first Nepal Global Film Festival, with around 100 to be selected for screening in Kathmandu.
नेपाल ग्लोबल फिल्म फेस्टिभलमा ५०० बढी फिल्म प्राप्त, छानिएका १०० काठमाडौंमा देखाइने
नेपाल ग्लोबल फिल्म फेस्टिभल (NGFF) को पहिलो संस्करणका लागि विश्वभरबाट ५०० भन्दा बढी चलचित्र प्राप्त भएको आयोजकले जनाएको छ। तीमध्ये करिब १०० चलचित्र छनोट गरेर आगामी फागुन ७ देखि १० गतेसम्म काठमाडौंमा प्रदर्शन गर्ने तयारी छ।
नेपाल फिल्म एण्ड मिडिया एकेडेमीले आयोजना गर्न लागेको महोत्सव सन् २०२७ फेब्रुअरी १९ देखि २२ सम्म चल्नेछ। ‘हिमालदेखि सागरसम्मका कथाहरूको उत्सव’ नारासहित हुने चारदिने कार्यक्रममा चलचित्र प्रदर्शनसँगै कार्यशाला, छलफल र अन्तर्राष्ट्रिय चलचित्रकर्मीबीच भेटघाटका कार्यक्रम पनि राखिनेछन्।
प्राप्त फिचर फिल्म, सर्ट फिल्म र डकुमेन्ट्रीको छनोट निर्देशक सुवर्ण थापा नेतृत्वको समितिले गर्नेछ। छनोट भएका चलचित्रमध्ये उत्कृष्टलाई निर्देशक अशोक शर्मा नेतृत्वमा रहने नेपाली तथा विदेशी जुरीले विभिन्न विधामा नगद पुरस्कारसहित अवार्ड प्रदान गर्ने आयोजकले जनाएको छ।
महोत्सव निर्देशक गणेश पाण्डेले पहिलो संस्करणमै प्राप्त चलचित्रको संख्याले आफूहरूलाई उत्साहित बनाएको बताए। उनका अनुसार यसले नेपालमा हुन लागेको महोत्सवप्रति अन्तर्राष्ट्रिय चलचित्रकर्मीको चासो देखाएको छ।
“हाम्रो पहिलो संस्करणमै विश्वभरबाट यति ठूलो संख्यामा फिचर, सर्ट र डकुमेन्ट्री फिल्म प्राप्त हुनु निकै उत्साहजनक उपलब्धि हो,” पाण्डेले भने। “हामी नेपालकै एउटा ठूलो महोत्सव बनाउने उद्देश्यका साथ अघि बढिरहेका छौँ।”

Organized by Nepal Film and Media Academy, the Nepal Global Film Festival is scheduled for February 19–22, 2027, in Kathmandu under the theme “Celebrating Stories from the Himalayas to the Sea.”
महोत्सवमा मनोरञ्जनका कथासँगै हिमाल, वातावरण, मानवशास्त्र, मानवअधिकार, महिला तथा आदिवासी जनजातिका जीवन र संस्कृतिमा आधारित चलचित्र समेट्ने योजना छ। एनिमेसन, विद्यार्थीले बनाएका चलचित्र र कृत्रिम बौद्धिकता (AI) मा आधारित चलचित्रलाई पनि प्राथमिकता दिइनेछ।
आयोजकले विभिन्न देशबाट करिब १०० चलचित्रकर्मी, सञ्चारकर्मी तथा चलचित्र उद्योगका व्यक्तित्वलाई सहभागी गराउने तयारी गरिरहेको जनाएको छ। हलिउड, बलिउड र चिनियाँ चलचित्र क्षेत्रका चलचित्रकर्मीलाई पनि अतिथिका रूपमा सहभागी गराउने योजना छ। यद्यपि, उपलब्ध विवरणमा अतिथिहरूको नाम खुलाइएको छैन।
आयोजक समितिका सदस्य फूलमान बलका अनुसार चार दिनसम्म प्रदर्शनसँगै विशेष सम्मान, अन्तरक्रिया, चलचित्र कार्यशाला, प्यानल छलफल र अन्तर्राष्ट्रिय सम्पर्क विस्तारका कार्यक्रम सञ्चालन हुनेछन्।
महोत्सवले नेपाली चलचित्रलाई विदेशी दर्शक र अन्तर्राष्ट्रिय बजारसम्म पुर्याउने अवसर खोज्ने लक्ष्य राखेको छ। नेपाली प्रतिभा र सिर्जना चिनाउनुका साथै विदेशी निर्माता तथा निर्देशकलाई नेपालमा छायांकन र चलचित्र निर्माणका सम्भावनाबारे जानकारी दिने आयोजकको योजना छ।
नेपालको हिमाली भूगोल, प्राकृतिक सौन्दर्य, सांस्कृतिक विविधता र स्थानीय कथालाई अन्तर्राष्ट्रिय चलचित्र क्षेत्रसँग जोड्न सके चलचित्र पर्यटन र सहकार्यका अवसर बढ्ने आयोजकको अपेक्षा छ। महोत्सवमार्फत विदेशी लगानीको सम्भावनाबारे पनि संवाद अघि बढाउने लक्ष्य राखिएको छ।
आयोजकले युनेस्कोको ‘क्रिएटिभ सिटी अफ फिल्म’ अवधारणासँग जोडेर काठमाडौंलाई चलचित्र सिर्जना र सांस्कृतिक आदानप्रदानको केन्द्रका रूपमा अघि बढाउने आकांक्षा पनि व्यक्त गरेको छ।
महोत्सवका लागि राष्ट्रिय तथा अन्तर्राष्ट्रिय चलचित्र संस्था, कूटनीतिक नियोग, शैक्षिक संस्था, पर्यटन व्यवसायी र निजी क्षेत्रसँग सहकार्यबारे छलफल भइरहेको आयोजकले जनाएको छ।











